सरकार गठन भएको एक महिना पुरा हुँदा समेत प्रधानमन्त्री पुष्पकमल दाहाल ‘प्रचण्ड’ले मन्त्रीमण्डललाई अझै पूर्णता दिन सकेका छैनन् । सरकार गठन भएको तीन सातापछि कांग्रेसले मन्त्री छनोट गरेर चौथौ पटक मन्त्रीमण्डल विस्तार गरेपनि अझै चार मन्त्रालय खाली नै रहेको छ । खाली रहेको मन्त्रीलय प्रधानमन्त्री प्रचण्डले सम्हाल्दै आएका छन् ।
महिला बालबालिका तथा समाजकल्याण, विज्ञान तथा प्रविधि, पशुपंक्षी र खानेपानी तथा सरसफाइ मन्त्रालय बाँकी छ । कांग्रेसले १५ मन्त्राल लिइसकेको छ । माओवादी केन्द्रले आठ मन्त्रालय लिएको छ । राप्रपाले २ र नेकपा सयुक्तले १ मन्त्रालय गरी २६ मन्त्री भइसकेका छन् भने बाँकी चार मन्त्रालय प्रचण्डले मधेसी जनअधिकार फोरम लोकतान्त्रिक र साना दलको लागि छुटयाएर राखेका छन् ।
गच्छदार नेतृत्वको फोरम लोकतान्त्रिक सरकारमा सहभागी नहुने भएपछि मन्त्री बन्नको लागि प्रधानमन्त्री निवास वालुवाटारमा धर्ना सुरु भएको छ । एक महिनाको अवधिमा दैनिकजसो सांसदद्धय प्रेमबहादुर सिंह र बिश्वेन्द पासवान जाने गरेकाले वालुवाटारमा प्रचण्ड दिक्क भएका छन् ।
बालुवाटार स्रोतका अनुसार दिनहुँजसो प्रधानमन्त्रीलाई भेट्न भन्दै बालुवाटार पुग्ने नेताहरु विश्वेन्द्र पासवान, एकनाथ ढकाल, प्रेमबहादुर सिंह र हरिचरण साह हुन् । नयाँ सरकारमा मन्त्री हुनको लागि उनीहरुले दौडधूप थालेको महिना दिन पुग्न लागिसक्यो । तर प्रधानमन्त्री पुष्पकमल दाहालले अझै उनीहरुलाई मन्त्री नियुक्त गर्नुभएको छैन । आश्वासन चाहिँ दिइरहनुभएको छ । पहिले प्रचण्डकै आश्वासन पाएर उनीहरुले अन्तिम अवस्थामा ओली सरकार छाडेका थिए ।
यस पटक साना दललाई सरकारमा सहभागी नगराउने बारेमा पनि प्रधानमन्त्री प्रचण्ड र कांग्रेस सभापति शेरबहादुर देउवाबीच सहमति भएको छ । न सरकार ढाल्दा काम दिने न सरकार गठन गर्दा निर्णायक हुने भन्दै दुवै नेताले सहमतिमा साना एक सिटे दललाई मन्त्री नबनाउने निष्कर्ष निकालेका हुन् ।
सिंह र पासवान भने ओली नेतृत्वको सरकारमा सम्हालेको मन्त्रालय पाउनको लागि रातदिन नभनी वालुवाटार धाउन गरेका छन् । ‘दिनहुँ सिंह र पासवान वालुवाटार आएर घन्टौ कुर्नुहुन्छ’, प्रचण्डका सचिवालयका एक सदस्यले भने, ‘प्रचण्डको समय हुँदैन, ढोकाबाट चिहाएर पनि चित्त बुझाएर जाने गरेका छन् ।’ चौथो पटक पनि मन्त्री छनोटमा नपरेपछि सिंह र पासवानले वालुवाटारमा धर्ना नै कसेका छन् । – एस काठमाडौँबाट
