">
काठमाडौँ – एमाले सचिव योगेश भट्टराईले भारतको चित्त बुझाउन संविधान संशोधन हुन नसक्ने बताएका छन् । प्रेस चौतारीले सुनसरीको इटहरीमा बिहीबार गरेको पत्रकार भेटघाटमा भट्टराईले एमाले संविधान संशोधनको पक्षमा नरहेको प्रस्ट्याए ।
नेपालको संविधान संशोधनका विषयमा प्रधानमन्त्री पुष्पकमल दाहाल ‘प्रचण्ड’ ले उपप्रधान तथा गृहमन्त्री विमलेन्द्र निधिमार्फत भारतीय प्रधानमन्त्री नरेन्द्र मोदीलाई पत्र पठाउनु आपत्तिजनक भएको बताए ।
उनले मोदीलाई नभई प्रमुख प्रतिपक्षी एमाले अध्यक्ष केपी ओलीलाई पत्र लेख्नुपर्ने उनको तर्क थियो । ‘संविधान संशोधनका लागि नरेन्द्र मोदीलाई होइन, केपी ओलीलाई पत्र लेख्नुपर्छ’, भट्टराईले भने, ‘एमालेको सहमति बिना कसरी संविधान संशोधन हुन्छ र ?’ उनले कुनै पनि हालतमा सिमांकनमा हालको सात प्रदेशमा दायाँबायाँ नहुने जिकिर गरे ।
संसदबाट सिमांकन हेरफेर गर्न नमिल्ने भन्दै उनले त्यसका लागि जनमत लिनुपर्ने उल्लेख गरे । काँग्रेस माओवादीले संविधान नै नपढी सिमांकन हेरफेरका लागि संविधान संशोधन प्रक्रिया अघि बढाउन खोजेको आरोप लगाए ।
फरक प्रसंगमा उनले वर्तमान प्रचण्ड नेतृत्वको सरकारलाई टायर पञ्चरको संज्ञा दिए । भट्टराईले पञ्चर भएको टायर धेरै दिन गुड्न नसक्ने भन्दै सरकारको कामको सदन र सडक दुवैतिरबाट विरोध गर्ने बताए । सरकार देशभित्र मात्र नभई बाहिरसमेत अलोकप्रिय भएको दाबी गर्दै उनले चिनियाँ राष्ट्रपतिको नेपाल भ्रमण स्थगन हुनुलाई सरकारको कूटनीतिक अयोग्यता भने ।
