काठमाडौँ – प्रधानमन्त्री सचिवालयले पानीको बिल नतिरेपछि काठमाडौं उपत्यका खानेपानी लिमिटेड (केयुकेयल) का कर्मचारीको टाउको दुख्न थालेको छ ।

एक वर्षे/दुई वर्षको होइन, झन्डै सात वर्ष अगाडिको खानेपानीको बिल भुक्तानी नभएको मामिलाले यस्तो भएको हो । शान्तिप्रक्रियामा आएपछि नयाँबजार, खुसीबुमा घर भाडामा लिएर प्रचण्ड बसेका थिए । उनको सुरक्षाका लागि जनसेना, निजी सेक्युरिटी गार्डको ठूलो जमात खटिएको थियो । बाबुराम भट्टराई प्रधानमन्त्री हुँदा उनकी जेठीसासू तिमिला यमी केयुकेएलकी अध्यक्ष थिइन् ।

प्रचण्डको सचिवालयमा पिउने पानीको हाहाकार भएपछाडि उनैलाई बाबुराम भट्टराईमार्फत गुहारियो । ज्वाइँकै कारण त्यहाँ नियुक्ति पाएकी यमीले यो कुरा नकार्ने कुरै थिएन । ट्यांकरको ट्यांकर पानी नयाँबजार पठाइयो । पछाडि हिसाब गर्दा खानेपानीको बिल मात्र पुग्यो १२ लाख ५० हजार रुपैयाँ † यसपछि प्रमुखहरू फेरिए । महालेखाले बेरुजुमध्ये १२ लाख ५० हजार देखायो । तिमिलापछि गएका अध्यक्ष, महानिर्देशकहरूले यसको हिसाब र बिलका फाइल पल्टाउँदै जाँदा प्रचण्डको सचिवालयमा पठाइएको पानीको बिल चुक्ता नभएको देखायो । महालेखाले बेरुजुको चाङमा उक्त रकमसमेत राखेसँगै केयुकेएलसँग जवाफ माग्यो । र, खानेपानीको महसुल भुक्तानी गर्न ३१ असारमा काठमाडौं उपत्यका खानेपानी लिमिटेडले बिल काटेको स्रोतको दाबी छ ।

लाजिम्पाटस्थित प्रचण्ड निवासको खानेपानीको बक्यौता तत्काल भुक्तानी गर्न केयुकेलले ३१ असारमा बिल बुझाएको थियो । बिलमा उल्लिखित १२ लाख ५० हजार रुपैयाँ मिनाह गर्न आदेश गर्दै खानेपानी तथा सरसफाइ मन्त्रालयमा सो बिल पुगेको छ ।

३१ असारमा दाहाल निवासमा बुझाइएको बिलमा उल्लिखित रकम हालसम्म पनि भुक्तानी नभएपछि केयुकेलले ताकेता गरेको थियो । तर, महसुल सम्पूर्ण रूपमा मिनाहका लागि तोक लगाउँदै दाहाल निवासको सो बिल खानेपानी तथा सरसफाइ मन्त्रालयमा पुगेको छ । ‘सबै महसुल मिनाहका लागि पहल गरिदिनुपर्यो, भनेर बिल खानेपानी तथा सरसफाइ मन्त्रालयमा आएको छ,’ मन्त्रालयका एक सहसचिवका अनुसार ‘कसरी भुक्तानी गर्न सकिन्छ भन्ने उपाय मन्त्रालयले अझै सुल्झाउन सकेको छैन ।

उता, ‘मुसा’ चरित्रका रूपमा उदाएका कालिकोटे सांसद प्रेमबहादुर सिंहलाई प्रधानमन्त्री प्रचण्डले खानेपानी मन्त्रालय नै दिने तयारी थालिरहेका छन् । र, उनीलाई उक्त मन्त्रालयमा लगेलगत्तै प्रचण्डको सचिवालयले सात वर्षदेखि चुक्ता नगरेको केयुकेएलको ऋण मिनाह हुने बताइन्छ ।