भूकम्पमा क्षतिग्रस्त बनेका पशुपति परिसरका मठमन्दिर बनाउने जिम्मा भारतीयलाई दिने प्रस्ताव संस्कृति पर्यटन तथा नागरिक उड्डयनमन्त्री जीवनबहादुर शाहीले फिर्ता गरिदिएका छन् ।
पशुपति मन्दिर परिसरका २५ भन्दा बढी मठमन्दिर, सत्तलसहितका सम्पदा जीर्णोद्धारका लागि भारत सरकारलाई अनुमति दिन सरोकारवाला निकायबीच केही दिनअघि सहमति भएको थियो ।
पुरातत्व विभाग र पशुपति क्षेत्रविकास कोषबीच गत साता सहमति गरेर भारत सरकारलाई सबै मन्दिर बनाउन दिने सहमति स्वीकृतिका लागि मन्त्रिपरिषद लगिएको थियो ।
बुधबार नेपाल पर्वतारोहण संघको २६ औं वार्षिक साधारणसभामा बोल्दै मन्त्री शाहीले भने, ‘पशुपति क्षेत्रभित्रका मन्दिरसमेत बनाउने गरी भारतीय प्रस्ताव आएको थियो, मैले त्यो प्रस्ताव फिर्ता गरें ।’
पशुपति नेपालको धरोहर र हिन्दू धर्मको पवित्र भएकाले पशुपतिको भित्री क्षेत्रको निर्माण नेपाल सरकार आफैंले गर्ने बताए । ‘भारतले बनाउन चाहेका बाहिर क्षेत्रहरु दिन सकिन्छ’, उनले भने, ‘भित्री मन्दिरहरु नेपालले बनाउँछ ।’
पशुपतिका मन्दिरहरुको पुननिर्माणका लागि १ अर्ब ४० करोड रुपैयाँ लाग्ने अनुमान गरिएको छ ।
कारोबार दैनिकबाट
