काठमाडौं – नेपाल विद्यार्थी संघमा सभापति शेरबहादुर देउवा समुहसँग अघोषित कार्यगत एकता गरेको कांग्रेस नेता कृष्णप्रसाद सिटौला समुहले महिला संघको महाधिबेशनमा बरिष्ठ नेता रामचन्द्र पौडेलसँग साँठगाँठ गर्ने तयारी गरेको छ । संवाद अन्तिम चरणमा पुगेपनि पूर्ण सहमति भने भइनसकेको उनी निकट स्रोतले बताएको छ । भोली २९ भदौदेखि सुरु हुने महिला संघको महाधिबेशनमा आफ्नो समुहको बलियो उपस्थित गराउन सिटौला रातदिन खट्टिएका छन् ।
देउवा र पौडेल दुवै समुहसँग लामो समयदेखि संवाद गरिरहेका सिटौला पौडेल समुहसँग पछिल्लो समय नजिकिएका छन् । महिला संघमा सभापति देउवा समुह बलियो मानिन्छ । तर सिटौला समुहले पौडेल समुहलाई साथ दिए कडा प्रतिस्पर्धा हुने अनुमान कांग्रेसजनहरुले गर्न थालेका छन् । ‘आफै चुनाव लडेजतिकै सिटौला दाई क्रियासिल हुनुहुन्छ’ उनी निकट एक नेताले भने ‘प्रत्येक महिला संघका प्रतिनिधिलाई फोन सम्पर्क गरिरहनु भएको छ ।’ नेपाली कांग्रेसमा आफ्नो समुहलाई बलियो बनाउन सिटौला विहानदेखि साँझसम्म कार्यकर्ता भेटघाटमा लागिरहेका छन् ।
१० बर्षे सशस्त्र युद्ध गरेको माओवादीलाई शान्ति प्रक्रियामा ल्याउँदा सिटौला गृहमन्त्री थिए । गृहमन्त्री हुँदै सशस्त्र युद्धका कमाण्डर पुष्पकमल दाहाल प्रचण्डलाई सिक्लेसबाट हेलिकप्टरमा काठमाडौं ल्याएका थिए । ‘सिटौला दाई त्यो समयभन्दा बढि आजभोली क्रियासिल हुनुहुन्छ’ उनी निकट नेताले भने । सिटौला पार्टीका सवै भात्रृ संगठनहरुमा आफ्नो उपस्थिति बलियो बनाउने रणनीतिमा छन् । नेविसंघमा देउवासँग कार्यगत एकता गरेर पदाधिकारीदेखि केन्द्रीय सदस्यसम्म आफ्नो राम्रो उपस्थिति गराएका सिटौला महिला संघ र तरुण दलमा पनि त्यही उपस्थिति बनाउन कस्सिएका छन् ।
उनको अभियानमा कांग्रेसका प्रभावशाली नेता तथा स्वास्थ्यमन्त्री गगन थापा पनि लागेका छन् । महिला संघमा दोस्रो उपस्थिति बनाउने उनीहरुको रणनीति रहेको छ । भोलीदेखि हुने महाधिबेशनमा देउवा र पौडेल दुवै समुहले आज प्यानल घोषणा गरेका छन् । घोषणा गरेका दुवै प्यानलले सिटौलाका लागि केही स्थान पनि छुट्टयाएका छन् । सिटौलाले धना खतिवडाको नेतृत्वमा आफ्नो समुह तयार पारेको छ ।
- एस काठमाडौँ
