काठमाडौं – बुटवलमा केन्द्रीय कार्यालय रहेको पश्चिमाञ्चल फाइनान्सले चालु आर्थिक वर्षको दोस्रो त्रैमासमा एक करोड ८७ लाख ७१ हजार रुपैयाँ खुद नाफा कमाएको छ । यो नाफा रकम गत वर्षको यही त्रैमासमा भन्दा १२ लाख ८१ हजार रुपैयाँले धेरै हो । गत वर्ष पश्चिमाञ्चलले एक करोड ७४ लाख ९० हजार रुपैयाँ मात्र खुद नाफा कमाएको थियो ।

यता, पश्चिमाञ्चल फाइनान्सको खराब कर्जा १३।०९५ पुगेको छ । खराब कर्जा बढ्दा वित्तीय सूचकमा नराम्रो असर पुर्याउने देखिएको छ । गत वर्ष यही त्रैमासमा पश्चिमाञ्चलको खराब कर्जा ३.८०५ मात्र थियो । चुक्ता पुँजी ३४ करोड ९० लाख ३३ हजार रुपैयाँ रहेको पश्चिमाञ्चलको जगेडा कोषमा भने १९ करोड चार लाख १० हजार रुपैयाँ छ ।

यो त्रैमासमा फाइनान्सको खुद ब्याज आम्दानी ६ करोड ८६ लाख ६३ हजार रुपैयाँ छ । ब्याज आम्दानी गत वर्षको भन्दा ३५ लाख ४९ हजार रुपैयाँले धेरै हो । गत वर्ष पश्चिमाञ्चलको खुद ब्याज आम्दानी ६ करोड ५१ लाख १४ हजार रुपैयाँ मात्र रहेको थियो । फाइनान्सले सम्भावित जोखिमका लागि दुई करोड एक हजार रुपैयाँ छुट्याएको छ । पश्चिमाञ्चलको कस्ट अफ फन्ड ६.९७५ छ ।