सेवा विकास बैंक लिमिटेडको १२ लाख ६१ हजार सात सय ७८ कित्ता हकप्रद सेयरको विक्री मंगलबार (आज) देखि सुरु भएको छ । संस्थापक समूहतर्फ १० लाख ४० हजार १ सय ७१ कित्ता र सर्वसाधारण समूहतर्फ २ लाख २१ हजार ६ सय ७ कित्ता हकप्रद सेयर लिलामीमा विक्री गर्न लागेको हो । सेवाले गत मङ्सिर २३ गते देखि पुस २३ गतेसम्म हकप्रद सेयरको विक्री खुला गरी आवेदन माग गरेकोमा संस्थापक र सर्वसाधारण सेयर बाँडफाँड भई बाँकी भएको सेयरका लागि शिलबन्दी बोलपत्र आह्वान गरेको हो ।
कम्पनीको हकप्रदमा फागुन २३ गतेसम्म शिलबन्दी बोलपत्र पेश गर्न पाइनेछ । सेयरको न्यूनतम मूल्य प्रतिसेयर एक सय रुपैयाँ निर्धारण गरिएको छ । जसअनुसार, एक सय रुपैयाँ वा सोभन्दा बढी मूल्य अंकित गरी बोलकबोल गर्नुपर्नेछ । कम्पनीको सेयर खरीदको लागि बोलकबोल गर्दा न्यूनतम सय कित्ता वा सो भन्दा १० ले भाग जाने सम्पूर्ण आवेदन दिन सक्नेछ ।
कम्पनीले बाँडफाँटमा परेका आवेदकहरुलाई आवेदककै हितग्राही खातामा सेयर नामसारी गर्नेछ । त्यसैले, आवेदनमा हितग्राही खाता अनिवार्य रुपमा उल्लेख गर्नुपर्ने बताइएको छ । कम्पनीको विक्री प्रबन्धक एनएमबी क्यापिटल लिमिटेड रहेको छ ।
