काठमाडौँ – युनाइटेड मोदी इन्स्योरेन्सले १७ करोड २५ लाख रुपैयाँ बराबरको १७ लाख २५ हजार कित्ता प्राथमिक शेयर आइपिओ निष्कासन गरेको छ । कम्पनीले त्यसमध्ये ३४ हजार ५०० कित्ता कर्मचारी र ८६ हजार २५० कित्ता सामूहिक लगानी कोषको लागि आरक्षित गरेको छ । 

प्रति शेयर १०० रुपैयाँ अंकित मूल्यको निष्कासनमा न्युनतम ५० देखि अधिकतम १५ हजार कित्तासम्म आवेदन गर्न सकिने निस्कासन तथा बिक्री प्रबन्ध क एनआइबिएल क्यापिटलले जनाएको छ । १९ फागुनमा बिक्री खुला गरि छिटोमा त्यही महिनाको २३ गते र ढिलोमा ३ चैतमा बन्द गर्ने जनाइएको छ । 

कम्पनीले पर्वतको कुश्मा नगरपालिकास्थित मोदी खोलामा निर्माण गरेको १० मेगावाटको तल्लो मोदी -१ परियोजनाबाट अहिले बिजुली उत्पादन भइरहेको छ । उक्त परियोजना २०६९ सालमै निर्माण पूरा भएको थियो । 

अहिले तल्लो मोदी -१ को ‘क्यासकेट  प्रोजेक्ट’को रुपमा कम्पनीले साढे १० मेगावाटको तल्लो मोदी -२ को निर्माण प्रक्रिया अघि बढाएको छ । कम्पनीले यसअघि नै उक्त परियोजना बनाउने सोचसहित कर्मचारी आवास, पहुँच मार्ग, इन्टेक एवं १३२ केभी प्रशारण लाइन समेत पूरा गरिसकेको जनाएको छ । 

कम्पनीको शेयर संरचना अनुसार ७५ प्रतिशत संस्थापकहरुको लगानी रहेको छ । १० प्रतिशत आयोजना प्रभावित क्षेत्र र १५ प्रतिशत सर्वसाधारणकालागि खुला गरिएको हो । कम्पनीले आयोजना प्रभावितका लागि खुलाएको शेयर गत कात्तिकमा बाँडफाँड पूँजीकरण समेत गरीसकेको जनाएको छ। कम्पनीका संस्थापक शेयरधनी भने ३५९ जना रहेका छन् ।   

कम्पनीको अध्यक्षमा निर्माण व्यवसायी सुकुन्तलाल हिराचन रहेका छन्। कम्पनीले आगामी आर्थिक बर्ष २०७३ /७४ देखि लाभांश वितरण गर्ने लक्ष्य राखेको छ । चालु आर्थिक बर्ष देखिनै कम्पनी मुनाफामा जाने विवरण समेत आह्वान पत्रमा उल्लेख छ । 

कम्पनीको शेयरमा एनआइबिएल क्यापिटलको केन्द्रीय कार्यालय लाजिम्पाट, सिबिआईएल क्यापिटल, काठमाडौँ क्यापिटल, भिबोर क्यापिटल, गोर्खाज फाइनान्सका शाखाहरु, आइसिएफसी फाइनान्सका शाखाहरु, सिनर्जी फाइनान्सका शाखाहरु, हाम्रो विकास बैंक नुवाकोट, ग्रीन डेभलपमेन्छ बैंक बाग्लुङ र साझा विकास बैंकका शाखा मार्फत आवेदन दिन सकिनेछ । 

त्यस बाहेक ‘एप्लिकेशन सपोर्ट बाइ ब्लक सिष्टम ९आस्वा०’ स्वीेकृति लिएका बैंकमा खाता हुनेले आस्वा प्रणाली मार्फत लगानी गर्न सक्ने समेत जनाइएको छ ।