काठमाडौं – एसियन लाइफ इन्सुरेन्सले चैत १७ गते वार्षिक साधारण सभा बोलाएको छ । कम्पनीले साधारण सभा गर्न चैत ३ देखि १७ गतेसम्म सेयरधनी दर्ता किताब बन्द गर्ने भएको छ ।

 सभामा कम्पनीले २० बोनस सेयर दिने प्रस्ताव लैजाँदै छ । यसैगरी, बोनस सेयरपछि कायम हुने चुक्ता पुँजीमा २ः१ अनुपातमा हकप्रद सेयर निष्कासन गर्ने प्रस्ताव पनि एसियनले साधारण सभामा लैजाने भएको छ ।

एसियन लाइफले चालु आर्थिक वर्षको दोस्रो त्रैमासमा दुई करोड आठ लाख ५८ हजार रुपैयाँ खुद नाफा कमाएको छ । कम्पनीको चुक्ता पुँजी ६७ करोड १३ लाख २७ हजार रुपैयाँ छ भने रिजर्भ कोषमा २९ करोड २० लाख आठ हजार रुपैयाँ छ । एसियनको जीवन बिमा कोषको आकार आठ अर्ब ८६ करोड ५७ लाख ५६ हजार रुपैयाँको छ । कम्पनीको प्रतिसेयर आम्दानी ६ रुपैयाँ २१ पैसा र प्रतिसेयर नेटवर्थ १४३ रुपैयाँ ५० पैसा छ ।