काठमाडौं – हिमालयन बैकले बिहीबारदेखि एक लाख ४५ हजार ५६० कित्ता सेयर लिलामीमा बिक्री खुला गरेको छ । बैकले हकप्रद निष्कासन गर्दा बिक्री नभएको सर्वसाधारण समूहको सेयर लिलामीमा बिक्री गर्न लागेको हो । लगानीकर्ताले न्यूनतम एक सय रुपैयाँलाई आधार मानेर त्यसभन्दा बढी भाउमा बोलपत्र फारम भर्नुपर्नेछ । फारम भर्ने अन्तिम म्याद चैत १६ गतेसम्म तोकिएको छ । 

 यसअघि हिमालयनले कात्तिक २६ देखि मंसिर ३० गतेसम्म हकप्रद सेयर बिक्री खुला गरेको थियो । त्यतिबेला बिक्री नभएकोे सेयर अहिले टेन्डरमा बिक्री गर्न लागिएको हो । हिमालयनको लिलामी सेयरमा बिक्री प्रबन्धक लक्ष्मी क्यापिटल मार्केट लिमिटेड रहेको छ ।

आवेदकले लक्ष्मी क्यापिटल मार्केट लिमिटेड नयाँबानेश्वर, काठमाडौंमा पुग्ने गरी आवेदन फारम बुझाउनुपर्नेछ ।  बोलपत्र चैत १७ गते बिहान ११ बजे जय गणेश कमलादी ब्यांकेट, कमलादी काठमाडौंमा खोलिनेछ । हाल हिमालयनको चुक्ता पुँजी ६ अर्ब ४७ करोड ६३ लाख २० हजार रुपैयाँ छ ।

 चालु आर्थिक वर्षको दोस्रो त्रैमासमा हिमालयनले एक अर्ब दुई करोड ७८ लाख ७९ हजार रुपैयाँ खुद नाफा कमाएको छ । प्रतिसेयर आम्दानी ३५ रुपैयाँ १५ पैसा रहेको हिमालयनको प्रतिसेयर नेटवर्थ भने १७९ रुपैयाँ १६ पैसा छ ।