काठमाडौं – कृषि विकास बैंकले लिलामी सेयर बाँडफाँटमा नपरेको पैसा शुक्रबारदेखि फिर्ता दिन सुरु गरेको छ । कृषिले लगानीकर्ताले दरखास्त फारममा उल्लेख गरेको बैंक खातामा नै पैसा जम्मा गरिदिन सुरु गरेको हो । बैंकले हकप्रद निष्कासनका बेला नबिकेको १९ लाख ६८ हजार ५७५ कित्ता सेयर माघ २७ देखि फागुन १२ गतेसम्म लिलामीमा बिक्री गरेको थियो ।

 लिलामीमा न्यूनतम ३६१ रुपैयाँसम्म भाउ राख्नेले सेयर पाए भने अधिकतम ६०१ रुपैयाँसम्म प्रस्ताव आयो । कृषिको सेयर लिलामीमा नौ हजार २२३ जनाले आवेदन दिएका थिए । यसमध्ये २१ सय जनाले सेयर पाए । लिलामीमा नौ अर्ब रुपैयाँ भन्दा धेरैको आवेदन परेको थियो । 

कृषिले चालु आर्थिक वर्षको दोस्रो त्रैमासमा ९० करोड ६६ लाख ८९ हजार रुपैयाँ खुद नाफा कमाएको छ । चुक्ता पुँजी यो त्रैमासमा १० अर्ब ३७ करोड ४४ लाख रुपैयाँ छ । तर यसमा साधारण सेयरको चुक्ता पुँजी भने चार अर्ब ९४ करोड १६ लाख ८८ हजार रुपैयाँ मात्र छ । बाँकी अग्राधिकार सेयर सरकारको पाँच अर्ब ४३ करोड २७ लाख १२ हजार रुपैयाँ छ । बैंकको रिजर्भ कोषमा पनि नौ अर्ब २९ करोड २० लाख एक हजार रुपैयाँ जम्मा भैसकेको छ । यो रिजर्भ कोषले बैंकलाई मजबुत बनाएको छ । कृषिको प्रतिसेयर आम्दानी यो त्रैमासमा २९ रुपैयाँ ४९ पैसा पुगेको छ । त्यस्तै, प्रतिसेयर नेटवर्थ पनि २८४ रुपैयाँ ४३ पैसा छ ।