काठमाडौं – माछापुच्छ्रे बैंकले शुक्रबारदेखि लिलामीमा सेयर बिक्री सुरु गरेको छ । बैंकले हकप्रद निष्कासनका बेला नबिकेको सर्वसाधारण समूहको तीन लाख २३ हजार २०६ कित्ता र संथापकतर्फको ४८ हजार ६२३ कित्ता गरी कुल तीन लाख ७१ हजार ८२९ कित्ता सेयर लिलामीमा बेच्न सुरु गरेको हो । लगानीकर्ताले न्यूनतम मूल्य एक सय रुपैयाँ भन्दा माथि भाउ तोकेर बोलपत्र फारम भर्नुपर्नेछ । बोलपत्र चैत ३ गतेसम्म भर्न पाइनेछ । बिक्री प्रबन्धक सिभिल क्यापिटल मार्केट लिमिटेड काडमाडौं प्लाजा, कमलादीमा गएर बोलपत्र भर्न पाइनेछ ।

माछाले यसअघि मंसिर १९ देखि माघ २ गते सम्म ५०५ हकप्रद सेयर बिक्री खुला गरेको थियो । हकप्रद लिलामीमा आवेदकले न्यूनतम एक सय कित्ता वा त्यो भन्दा बढी १० अंकले भाग जाने सबै कित्तामा आवेदन दिन पाउने छन् । बोलपत्र पेस गर्दा आवेदकले अनिवार्य रुपमा डिम्याट खाता उल्लेख गर्नुपर्नेछ । बाँडफाँटपछि सेयर डिम्याट खातामै जम्मा गरिने भएकाले डिम्याट खाता नभएका आवेदन स्वतः रद्द हुने बैैंकले जनाएको छ । बोलपत्र चैत ४ गते सिभिल क्यापिटल मार्केट लिमिटेड काडमाडौं प्लाजा, कमलादीमा विहान ११ बजे खोलिनेछ ।

माछाले बोलपत्र खोलेको सातौं दिनदेखि बाँडफाँटमा नपरेको सेयरको रकम सिभिल क्यापिटल मार्केट लिमिटेड काडमाडौंबाट चेकमार्फत फिर्ता दिने भएको छ । माछापुच्छ्रेले चालु आर्थिक वर्षको दोस्रो त्रैमासमा ५७ करोड ५३ लाख १० हजार रुपैयाँ खुद नाफा कमाएको छ । बैंकको चुक्ता पुँजी चार अर्ब ६६ करोड ६४ लाख ३० हजार रुपैयाँ छ भने रिजर्भ कोषमा दुई अर्ब ४२ करोड ३८ लाख ९३ हजार रुपैयाँ छ । माछाको प्रतिसेयर आम्दानी २४ रुपैयाँ ६६ पैसा र प्रतिसेयर नेटवर्थ १२६ रुपैयाँ ७७ पैसा छ ।