काठमाडौं – मेगा बैंकको तीन लाख ८६ हजार ८८२ कित्ता सेयर लिलामी भर्ने आइतबार अन्तिम दिन हो । मेगाले संस्थापक समूहको एक लाख ६८ हजार ९९२ कित्ता र सर्वसाधारण समूहतर्फको दुई लाख १७ हजार ८९० कित्ता गरी कुल तीन लाख ८६ हजार ८८२ कित्ता सेयर लिलामीमा बिक्री खुला गरेको हो । लगानीकर्ताले न्यूनतम एक सय रुपैयाँलाई आधार मानेर त्यसभन्दा बढी मूल्य तोेकी निवेदन दिनुपर्नेछ । मेगाले हकप्रद निष्कासन गर्दा बिक्री नभएको सेयर यतिबेला लिलामी बिक्रीमा ल्याएको हो । यसअघि मेगाले साउन २७ देखि भदौ २० गतेसम्म ८१ लाख एक हजार ४३८ कित्ता हकप्रद सेयर बिक्री खुला गरेको थियो ।

आवेदकले नबिल इन्भेष्टमेन्ट बैंकिङ लिमिटेड, नक्साल काठमाडौं तथा मेगा बैंकको केन्द्रीय कार्यालय राइजिङ मल कमलादी काठमाडौंमा पुग्ने गरी आवेदन फारम बुभाउन सक्नेछन् । दुवै समूहको बोलपत्र चैत २१ गते नबिल इन्भेष्टमेन्ट बैंकिङ लिमिटेड नक्साल काठमाडौंमा खोलिनेछ । मेगाको यो लिलामी सेयरमा बिक्री प्रबन्धक नबिल इन्भेष्टमेन्ट लिमिटेड रहेको छ । यता टुरिजम बैंकसँग लगनगाँठो कस्न थालेको मेगाले यसअघि नै लगानीकर्तालाई १३.२५% बोनस सेयर र त्यसमा लाग्ने कर तिर्न ०.७०% नगद लाभांस वितरण गर्ने जनाइसकेको छ । बैंकको चैत ३ गतेको साधारण सभाले यो प्रस्ताब पास गरेको छ ।   

 त्यस्तै, मेगाले यो बोनस सेयर र बिक्री नभएको हकप्रद लिलामीमा बेचेपछि कायम हुने चुक्ता पुँजीबाट फेरि ६५% हकप्रद सेयर निष्कासन गर्ने प्रस्ताव पनि साधारण सभाबाट पारित गराएको छ । यो प्रस्ताव पारित भएपछि मेगाले १०० कित्ता सेयर बराबर थप ६५ कित्ता अनुपातमा हकप्रद सेयर निष्कासन गर्नेछ । राष्ट्र बैंककले तोकेको चुक्ता पुँजी पुर्याउन बैंकले आकर्षक हकप्रद सेयर प्रस्ताव गरेको हो । हाल मेगाको चुक्ता पुँजी चार अर्ब एक करोड २० लाख ३१ हजार रुपैयाँ छ । 

चालु आर्थिक वर्षको दोस्रो त्रैमासमा मेगाले ३७ करोड नौ लाख नौ हजार रुपैयाँ खुद नाफा कमाएको छ । प्रतिसेयर आम्दानी नौ रुपैयाँ २४ पैसा तथा १८ रुपैयाँ ५४ पैसा (बार्षिकीकरण) रहेको मेगाको प्रतिसेयर नेटवर्थ भने १३२ रुपैयाँ ५९ पैसा छ ।