स्याङ्गजा जिल्लाको अर्जुनचौपारी गाउँपालिका वडा नः १ स्थित राष्ट्रिय वाणिज्य बैंक लिमिटेडले १९० औं शाखा कार्यालय अर्जुनचौपारी स्थापना गरेको छ । संचार तथा सूचना प्रविधि मन्त्रालयका सचिव एवं राष्ट्रिय वाणिज्य बैंक संचालक समितिका अध्यक्ष महेन्द्रमान गुरुङ्गले एक समारोहका बीच उक्त शाखाको उद्घाटन गरे ।
सो समारोहमा प्रमुख अतिथि महेन्द्रमान गुरुङ्गले सरकारको नीति अन्तर्गत सबै स्थानीय निकायमा बैंकको शाखा पुर्याउने उद्धेश्यअनुरुप ग्रामिण र दुर्गम सवै स्थानमा बैंकको सक्षम उपस्थितीले देशैभरि वित्तीय समावेशीताको माध्यमबाट वित्तीय पहुँच पुर्याउन सघाउ पुग्ने बताए । उनले यस क्षेत्रमा १२८ वटा ल्याण्डलाइन टेलिफोन सेवा वितरण गर्ने र मोवाइल सेवालाई थप भरपर्दो बनाउने विचार व्यक्त गरे ।
कार्यक्रममा बैंकका प्रमुख कार्यकारी अधिकृत किरणकुमार श्रेष्ठले रावा बैंकले नयाँ सम्भाव्य क्षेत्रहरुमा शाखा स्थापना गरि दिगो आर्थिक बिकासको लागि वित्तीय पहुँच विस्तार गरिने बताए ।
सो समारोहमा नायब महाप्रवन्धक उद्धबप्रसाद खनालले स्वागत मन्तब्य व्यक्त गरेका थिए । बैंकको पोखरा क्षेत्रीय कार्यालयका उपप्रमुख जग जीवनराम श्रेष्ठको सभापतित्वमा सम्पन्न समारोहमा अर्जुनचौपारी गाउँपालिका अध्यक्ष दीर्घनारायण अर्याल, स्थानीय उद्यमी व्यवसायी तथा सर्वसाधारणको उपस्थिति रहेको थियो ।
