काठमाडौं – नेपाल आयल निगमले खाना पकाउने एलपी ग्यासको मूल्य बढाएको छ । निगमले सोमबार राति १२ बजेदेखि लागू हुने गरी ग्यासमा प्रतिसिलिन्डर २५ रुपैयाँले बढाएको हो।
निगमले भाउ बढाएसंगै प्रतिसिलिन्डर १ हजार ३७५ रुपैयाँ पुगेको छ । यस्तै निगमले पेट्रोल, डिजेल तथा मट्टीतेलको मूल्य भने प्रतिलिटर १ रुपैयाँका दरले घटाएको छ । अब पेट्रोलको मूल्य प्रतिलिटर १०९, डिजेल र मट्टितेलको मूल्य प्रतितलिटर ९९ रुपैयाँ कायम भएको छ ।
हवाई इन्धनको मूल्य भने निगमले यथावत नै राखेको छ । निगमका प्रवक्ता वीरेन्द्रकुमार गोइतका अनुसार पेट्रोलियम पदार्थको खरिद मूल्य केही घटेर आएकाले मूल्य समायोजन गरिएको हो ।
निगमले ‘पेट्रोलियम पदार्थको स्वचालित मूल्य प्रणाली कार्यान्वयन कार्यविधि, २०७१’ अनुसार प्रत्येक १५–१५ दिनमा पेट्रोलियम पदार्थको मूल्य समायोजन गर्दै आएको छ । भारतीय आयल निगमले प्रत्येक अंग्रेजी महिनाको १ र १६ तारिखमा पेट्रोलियम पदार्थको नयाँ मूल्यसूची पठाउँदै आएको छ ।
