">
- अर्थ सरोकार सम्बाददाता
काठमाडौँ । काठमाडौँको मैतीदेवीमा व्यापारीहरुले पसल खोल्न पाउने पर्ने भन्दै नाराबाजी गरेका छन् । बुधबार बिहान खोलेका पसल प्रहरीले बन्द गर्न लगाएपछि अत्यावश्यक बाहेकका पसलहरु पनि खोल्न पाउनुपर्ने माग राख्दै व्यापारीहरुले नाराबाजी गरेका हुन् ।
नाराबाजीका क्रममा प्रहरी र व्यापारीबीच केहीबेर तनाव भएको थियो । व्यापारीको नाराबाजीकैबीच प्रहरीले सबै पसलहरु बन्द गराएको छ । व्यापारीहरुले लामो समयदेखि लकडाउन भएका कारण व्यापार चौपट भएको र अब पनि व्यापार व्यवसाय गर्न नदिईएको भन्दै आक्रोशित छन् । उनीहरुले अब पनि व्यापार गर्न नदिए पेट पाल्नसमेत नसकिने बताएका छन् ।
यता मंगलबार बौद्ध क्षेत्रका व्यापारीहरुले पनि व्यवसाय सञ्चालन गर्न पाउनुपर्ने भन्दै विरोध जनाएका थिए । साथै कैलालीको धनगढीमा पनि व्यापारीहरुले उद्योग वाणिज्य संघले मोडालिटी परिवर्तन नगरे जारी लकडाउनको उल्लङ्घन गर्ने चेतावनी दिएका छन् ।
