काठमाडौँ । चीनले आफ्ना नागरिकलाई कोरोना भाइरसबाट हुने कोभिड-१९ भन्दा कयौं गुणा उच्च मृत्युदर ‘अज्ञात निमोनिया’ को रहेको भन्दै चेतावनी दिएको छ । काजकस्तानस्थित चिनियाँ दूतावासले एक चेतावनी जारी गर्दै अज्ञात निमोनियाले कोरोना संक्रमणबाट भन्दा बढी मानिसको मृत्यु भइरहेको जनाएको हो । 

मध्य एसियाली मुलुकमा यस किसिमको निमोनियाबाट जुनमा मात्र ६०० भन्दा बढी मानिसहरुको मृत्यु भइसकेको छ । काजकस्तानमा रहेका आफ्ना नागरिकलाई यस किसिमको निमोनियाबाट जोगिनका लागि सचेत र सजग हुन आग्रह गरेको छ । काजकस्तान र चीनको उत्तरपश्‍चिमी प्रान्त सिन्जियासँगको सीमा जोडिएको छ । 

सन् २०२० को सुरुआतका ६ महिनामा यस किसिमको निमोनियाबाट एक हजार ७७२ जनाको मृत्यु भइसकेको र जुनमा मात्र ६२८ जनाको मृत्यु भएको जनाइएको छ । चिनियाँ दूतावासलाई यस बारेमा कति जानकारी छ भन्‍ने खुलाइएको छैन । – पब्लिक न्युज एजेन्सी