- अर्थ सरोकार सम्बाददाता
काठमाडौं । यसपालीको दशैँमा नयाँ नोट साट्न नपाइने भएको छ । नेपाल राष्ट्र बैंकले कोरोना भाइरसको संक्रमण दिनहुँ बढिरहेको हुँदा अघिल्ला वर्षहरुमा झैं यस वर्षको दशैँमा नयाँ नोट निष्काशन नगर्ने भएको हो ।
राष्ट्र बैंकले हरेक वर्ष प्रतिव्यक्ति तथा संस्था तोकेर दशैंलाई लक्षित गरी नयाँ नोट वितरण गर्ने गरेको थियो । तर यसपाली भने बढ्दो कोरोना भाइसरको संक्रमणका कारण भिडभाड हुने जस्ता कुनै पनि कार्य नगर्ने सरकारको निर्देशन छ । सो निर्देशनलाई पालना गर्दै दशैँ लक्षित नयाँ नोट वितरण नगर्ने राष्ट्र बैंक मुद्रा व्यवस्थापन विभागका एक स्रोतले बताए ।
प्राप्त भएको जानकारी अनुसार राष्ट्र बैंकले पहिले जस्तो समय तोकेर वा बैंक निर्धारण गरेर यो दशैंमा नयाँ नोट वितरण नगर्ने भएको छ । यस सम्बन्धी थप छलफल भइरहेको छ भने असोजको पहिलो सातासम्म यस सम्बन्धी सूचना जारी हुन्छ ।
