• अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले माटोको गमला बजार लैजादै ज्येष्ठ नागरिकदेखि देशभर अरु कहाँ-के भयो भन्नेसम्मका दृश्यलाई फोटो समाचारमा समेटेका छौं । 

माटोको गमला खर्पनमा राखेर बेच्न लैजाँदै मध्यपुर थिमि पाचोका ज्येष्ठ नागरिक । सानो गमला रु १०० मा र ठूलोको रु ३५० सम्ममा बिक्री हुने उहाँ बताउनुहुन्छ । 

मध्यपुर थिमि–८ बोडे सरस्वतीखेलमा मेसिनमा धान झार्दै किसान परिवार । 

डोटीको दिपायल सिलगढी नगरपालिका–५ घोलतडाको सेती नदी किनारामा निर्माण गरिएको क्रसर उद्योग । उद्योग सञ्चालन भएसँगै जिल्लामा गिट्ट, बालुवा उत्पादन तथा बिक्री वितरणका लागि अहिले सहज भएको छ ।

भोजपुरको रामप्रसादराई गाउँपालिका –५ मानेभञ्याङमा खानेपानीको समस्याका कारण स्थानीयवासी बसाइँ सरी अन्यन्त्र गएपछि जीर्ण बनेका घर । 

काभ्रेपलाञ्चोकको रोशी गाउँपालिका–९ रजबासमा स्थानीयवासीले सञ्चालन गरेको खुवा उत्पादन केन्द्रमा खुवा बनाउँदै कामदार । यहाँ उत्पादित खुवा बनेपा र काठमाडौँमा बिक्री हुन्छ ।

भक्तपुर नगरपालिकाका प्रतिनिधिबाट शनिबार मासु पसल तथा विभिन्न खाद्यान्न पसलको अनुगमन । अनुगमनका क्रममा अधिकांश मासु पसलमा झिङ्गा भन्किएको र खाद्यान्न पसलमा म्याद नाघेका कमसल सामग्री बिक्रीमा राखेको पाइएको छ ।

मध्यपहाडी लोकमार्गअन्तरर्गत जाजरकोट भेरी नगरपालिका–१० मा निर्माण भएको वाल मापदण्ड विपरित सिमेन्ट र बालुवा प्रयोग गर्दा भत्किएको सडकबाट महिला स्याउला लिएर घरतर्फ लाग्दै ।