• अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले म्याग्दीको बेनीमा बिक्रीका लागि लैजाँदै गरेका भेँडादेखि देशभर अरु कहाँ-के भयो भन्नेसम्मका दृश्यलाई फोटो समाचारमा समेटेका छौं । 

म्याग्दीको बेनीमा धवलागिरि गाँउपालिका–१ गुर्जाबाट बिक्रीका लागि हिँडाएर ल्याइँदै गरेका भेँडा ।

भेरी नगरपालिकाबाट सुर्खेत लाँदै गरेको भैँसी । नगरपालिकाले भैँसी विक्रीवितरणमा रोक लगाए पनि दशैँका लागि भन्दै बाहिर जिल्ला लान लागिएको हो । 

कैलालीको टीकापुर– ७ सत्तीस्थित रहेको बेतबाँस उद्योगमा बेतका फर्निचर बनाउँदै कामदार । पुरन विकले सञ्चालन गर्नुभएको उद्योगमा १७ जनाले रोजगारी पाएका छन् । यहाँ निर्माण भएका बेतका सामान काठमाडौँसम्म जाने गरेका छन् ।

भरतपुर महानगरपालिका–१० मा रहेको नमुना लेडिज ट्रेलर्सकी सञ्चालिका नमुना पौडेल मास्क बनाउँदै । फेसबुकबाट सिकेर उहाँले लकडाउनमा मात्रै एक लाख मास्क बिक्री गर्नुभएको छ ।

कञ्चनपुरको भीमदत्त नगर बजारको भाँसीमा तामाका भाडा साइकलमा राखेर बेच्न हिँडेका व्यापारी । स्थानीय धातुका भाडाकुडा बनाउने व्यक्तिहरु पेशालाई आधुनिकिकरण गर्न नसक्दा पेशा पलायन हुन थालेका छन् ।

पाल्पाको रैनादेवी छहरा गाउँपालिका वडा नं ५ लेख टोलमा स्थानीय जातका कुखुरा पाल्दै युवा । भेटेनरी अस्पताल तथा पशु सेवा विज्ञ केन्द्र पाल्पाको सहयोगमा मिलनसार कुखुरापालन तथा कृषि समूहका ३० सदस्यले स्थानीय कुखुरा पालन गर्न थालेका छन् । 

गुड नेवर्स इन्टरनेशलनको आर्थिक तथा प्राविधिक सहयोगमा सामुदायिक विकास मञ्च नेपाल डोटीले जिल्लाको पूर्वीचौँकी गाउँपालिका–७ पोखरीका किसानको आयस्तर बृद्धि गर्नका लागि निःशुल्क रुपमा वितरण गरेका उन्नत जातका बाख्रा ।

डोटीको शिखर नगरपालिका–१ मेड्डि गाउँमा धान काट्दै गरेका किसान । समयमै धान पाकेपछि यहाँका गाउँघरमा किसानलाई धान काट्न भ्याइ नभ्याइ छ । 

दिक्तेल बजारको विभिन्न ठाउँमा सजाउनेगरि फलामे डण्डी प्रयोग गरेर गमला निर्माण गर्दै कामदार । भर्खरै ढलानको काम सम्पन्न गरिएको दिक्तेल बजारको सडक दायाँ र बाँया विभिन्न प्रजातिका फूल रोपिएको गमला दश÷दश मिटरको फरकमा राख्ने तयारी गरिएको छ ।