काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले परालको डोरीबाट सुकुल बुनेर जीविका चलाउँदै वृद्धदेखि देशभर अरु कहाँ-के भयो भन्नेसम्मका दृश्यलाई फोटो समाचारमा समेटेका छौं । 

भक्तपुर कुमालेटोलमा परालको डोरीबाट सुकुल बुन्दै वृद्ध । स्थानीयस्तरमा उत्पादन गरिएको यो सुकुल काठमाडौँ उपत्यकाका होटल र रेष्टुरेन्टहरुमा पठाइन्छ । 

ललितपुरको गोदावरी नगरपालिका–९ छम्पीमा धान झार्न काटेको धानको बिटा बोक्ने क्रममा खेतमा पुगेका किसान । 

जिल्ला प्रशासन कार्यालय तनहुँमा नेपाली नागरिकताको प्रमाणपत्र लिन सर्वसाधारणको भीड । कोभिड– १९ को सङ्क्रमण बढी रहेको अवस्थामा भौतिक दूरी कायम गरी सेवा लिएको भने देखिएन । 

बागलुङ नगरपालिका–८ सिगानाका अगुवा कृषक अनन्तबहादुर खड्काको बारीमा फलेको किबी । उहाँले सुन्तला खेतीसँगै किबीखेती गर्दै आउनुभएको छ ।

जुम्लाका रामहरि कार्कीले घाममा सुकाएको ओखर । ओखर प्रति दान रु १० मा बिक्री हुने उहाँ बताउनुहुन्छ । 

नवलपुर रहजरका किसानले व्यावसायिक रुपमा टनेलमा गरेको काँक्रा खेती ।

म्याग्दीको धवलागिरि गाउँपालिका–५ मल्कबाङ ओखोरबोटका किसान भेडाको ऊन काट्दै । लेकबाट बेंसीमा भेडीगोठ झारेपछि भेडाबाख्राको ऊन काटिन्छ । ऊन स्वीटर, गाईवस्तुको दाम्लोलगायत सामान बनाउन प्रयोग गरिन्छ । 

बागलुङ कारागारमा रहेका कैदी बन्दीले बुनेका मुढा । मुढा बुन्ने सीप बन्दीका लागि आयआर्जनको माध्यम बनेको छ ।