देश बोल्ने फोटो कथा : कोरोना कहरमा पनि कैलालीको मालपोत कार्यालयमा सेवाग्राहीको भिड, हेर्नुहोस् देशभर अरु कहाँ-के भयो ?

अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले कोरोना कहरमा पनि कैलालीको मालपोत कार्यालयमा सेवाग्राहीको भिडदेखि देशभर अरु कहाँ-के भयोसम्मका दृश्यलाई फोटो समाचारमा समेटेका छौं ।

हेरौं फोटो समाचार :

कैलालीको मालपोत कार्यालय टीकापुरमा सेवाग्राहीको भीड । कार्यालयमा सीमित कर्मचारी हुँदा सेवाग्राहीले सहजै सेवा पाउन सकेका छैनन । सरकारले स्वास्थ्य मापदण्ड अपनाएर सेवा लिन र कर्मचारीलाई सेवा दिन आग्रह गर्दा पनि मालपोतमा भएको भीडका कारण कोरोनाको सङ्क्रमण अझ बढ्ने सङ्केत देखिएको छ ।

पोखरा –९ पृथ्वीचोकमा हरियो साजसब्जी बिक्री गर्दै महिला । तरकारी व्यापारबाट महिलाहरु आत्मनिर्भर बन्दै गएका छन ।

जाजरकोटको बारेकोट गाउँपालिकामा खाद्य व्यवस्था तथा व्यापार कम्पनीको नयाँ डिपोमा राखिएको खाद्यान्न ।

म्याग्दीको धवलागिरि गाउँपालिका–७ धारापानीस्थित नेचुरल ह्याडीक्राफ्ट उद्योगमा अल्लो प्रशोधन गरेर तयार पारिएको कपडा देखाउँदै उद्योगका सञ्चालक किरण थापा ।

बागलुङ, तमानखोला गाउँपालिका–३ का महिला तानमा ढाकाको कपडा बुन्दै । तमान गाउँका १४ जना उद्यमीले ढाकाको कपडा उत्पादन र बिक्री गर्दै आएका छन् ।

तिहार नजिकिँदै गर्दा सर्वसाधारणको चहलपहल बढेको प्रदेश नं १, धरान बजार । बजारे चहलपहलमा भौतिक दूरी कायम गर्ने र मास्क लगाउने सख्ङ्या भने कम देखिएको छ ।

तनहुँको व्यास नगरपालिका–५ मानहुँकोटमा चटपट बिक्री गरिँदै । मानहुँकोटमा पर्यटकको भीडभाड बढेपछि यहाँको व्यापार व्यवसाय पनि फस्टाएको छ ।

कैलालीको टीकापुरमा रहेको नेपाल खाद्य व्यवस्था तथा व्यापार कम्पनी लिमिटेलाई धान तौलिएर दिँदै किसान । खाद्यले बजार मूल्यभन्दा बढी दिएकाले खाद्य कम्पनीलाई नै किसानले धान दिएका हुन ।