• अर्थ सरोकार सम्बाददाता

काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

आजको अंकमा हामीले तिहार नजिकिएसँगै पोखरामा बिक्रीका लागि राखिएका रोटीका परिकारदेखि देशभर अरु कहाँ-के भयोसम्मका दृश्यलाई फोटो समाचारमा समेटेका छौं । 

तिहार पर्व नजिकिएसँगै पोखरा–१, बगरमा बिक्रीका लागि राखिएका विभिन्न प्रकारका रोटीका परिकार ।बेदकोट नगरपालिकाको सुन्दरपुरमा रहेको बाली संरक्षण प्रयोगशालामा तयार गरिएको कन्या जातको च्याउको बीउ र्याकमा राख्दै गरेका कर्मचारी । प्रयोगशालाबाट ६५० पोका बीउ २० जना व्यावसायिक च्याउ खेती गर्ने किसानलाई बिक्री गरिएको छ ।

डोटीको दिपायल पिपल्लामा कामका जुटेका महिला श्रमिकहरु । जिल्लामा पुरुष भन्दा महिला कामदार बढी छन् । 

रामपुरको बेझाड खेतमा थ्रेसर मेसिन लगाएर निकालिएको धान घर लैजान भर्दै कृषक । 

दाङको तुलसीपुर उपमहानगरपालिका वडा नं १३ बखरियाका युवा शिशिर रावतले व्यावसायिक रुपमा गरेको गोलभेडा खेती । 

शुक्लाफाँटा नगरपालिकाको पिपलाडीका किसान खेतमा रोपिएको काउली गोडमेल गर्दै । यहाँका किसानले व्यावसायिक तरकारीखेती गरेर मनग्य आम्दानी लिँदै आएका छन् ।

ठेकेदार सम्पर्कविहीन भएपछि अलपत्र परेको म्याग्दीको बेनी–दरवाङ सडक आयोजनाअन्तर्गत बेनी नगरपालिका–४ सिंगा खण्डको सडक । सडक स्तरोन्नतिमा ढिलाई हुँदा मालिका, मंगला र धवलागिरि गाउँपालिकाका नागरिकलाई सास्ति भएको छ । 

धादिङस्थित त्रिशुली नदीमा जलयात्रा गर्दै पर्यटक । यहाँ पछिल्लो समय जलयात्रामा पर्यटक आकर्षित भएका छन् ।