‘सस्तो’ पसलमा सेवाग्राहीको ‘महंगो’ भिड, यसरी पनि कोरोना संक्रमण नियन्त्रण होला र ?

सुदर्शन श्रेष्ठ/अर्थ सरोकार सुदूरपश्चिम ब्युरो

धनगढी । धनगढीमा सुपथ मुल्य पसल सञ्चालन हुन थालेपछि सेवाग्राहीको भिड लाग्न थालेको छ । अन्य पसलमा भन्दा सस्तो मुल्यमा उपभोग्य सामान खरिद गर्न पाईने भएपछि अपेक्षाभन्दा बढी नै भिड लाग्न थालेको हो ।

कोरोना महामारीका बेला सस्तो मुल्यमा सामान पाईने भन्दै सेवाग्राहीको भिड लाग्दा संक्रमणको जोखिम बढेको छ । साल्ट ट्रेडिङ्ग कर्पोरेशन लिमिटेडको क्षेत्रिय कार्यालय धनगढीले चाडपर्वलाई लक्षित गरि सञ्चालनमा ल्याएको सुपथ मुल्य पसलमा अहिले दैनिक सयौँको संख्यामा सेवाग्राही पुग्ने गरेका छन् । सामान खरिदका लागि पुग्ने सेवाग्राहीकोबीचमा दुरी कायम गरिएको छैन भने कतिपयले त अति आवश्यक मास्क तथा सेनिटाईजरको प्रयोग समेत गरेको देखिदैन ।

कोरोना रोकथाम तथा नियन्त्रणका लागि सरकारले मापदण्ड नै निर्माण गरी भिडभाड नगर्न आदेश जारी गरेको भएतापनि नागरिक भने त्यसको उल्लंघन गर्नमै व्यस्त बनेका छन् । सँधै सरकार असफल भयो भन्नुभन्दा पनि आ आफ्नो ठाउँबाट सतर्क बन्न आवश्यक देखिन्छ ।