">
- अर्थ सरोकार सम्बाददाता
काठमाडौँ । चन्द्रागिरी हिल्स लि. ले कम्पनीको शेयर रजिष्ट्रार सम्बन्धी कार्य गर्नको लागि ग्लोबल आइएमई क्यापीटल लि. लाई शेयर रजिष्ट्रारमा नियुक्त गरेको छ । सो सम्बन्धमा आज ग्लोबल आइएमई क्यापिटलको केन्द्रीय कार्यालयमा भएको एक कार्यक्रममा चन्द्रागिरी हिल्स लि.र क्यापीटलबीच बिहिबार शेयर रजिष्ट्रार सम्बन्धी सम्झौता सम्पन्न भएको छ । सम्झौतापत्रमा चन्द्रागिरी हिल्स लि. को तर्फबाट वित्त प्रमुख विष्णु गौतम र क्यापिटलको तर्फबाट प्रमुख कार्यकारी अधिकृत पारस मणी ढकालले हस्ताक्षर गरे ।
हालै मात्र स्थानिय बासिन्दा र सर्वसाधारणमा शेयर जारी गरी शेयर आवेदन गर्ने सबै नेपाली नागरिकलाई १ वर्षसम्म केबुलकारको टिकट यात्रामा २५ प्रतिशत छुट दिई आन्तरिक पर्यटनलाई प्रोत्साहन गरेको चन्द्रागिरी हिल्स लि.को अधिकृत पुँजी रु. २ अर्ब र जारी पुँजी रु. १ अर्ब ५३ करोड ४० लाख ९१ हजार रहेको छ ।
आन्तरिक तथा बाह्य पर्यटकहरुलाई आकर्षित गर्न कम्पनीले केबुलकार सञ्चालनमा ल्याई चन्द्रागिरीलाई एक उत्कृष्ट गन्तब्य स्थलको रुपमा परिचित गराएको छ भने भ्यु टावर र बुटिक होटेल पनि सञ्चालनमा ल्याइसकेको छ । त्यसैगरी निकट भविष्यमा जिपलाइन परियोजना अन्तर्गत विभिन्न साहसिक खेलहरु पनि सञ्चालनमा ल्याउने कम्पनीले जनाएको छ ।
