नयाँ दिल्ली । भारतले आगामी वर्षका लागि नेपाललाई दिने वित्तीय अनुदानमा गत वर्षको तुलनामा करिब तीन अर्ब रुपैयाँले वृद्धि गरेको छ । भारतीय वित्त मन्त्री निर्मला सितारमणले सोमबार लोकसभामा पेश गरेको २०२१/२२ को बजेटमा नेपाललाई दिने अनुदानमा गत वर्षको तुलनामा करिब दुई अर्व भारुले वृद्धि गरिएको छ । बजेटमा आगामी वर्षका लागि नेपाललाई दिने अनुदानका लागि ९ अर्व ९२ करोड भारु (१५ अर्व ८७ करोड रुपैयाँ) विनियोजन गरिएको छ ।

दुई देशबीचको सम्बन्ध सुधारोन्मुख दिशामा अगाडि बढिरहेको सन्दर्भमा भारतले बजेटमा गरेको वृद्धिलाई अर्थपूर्ण ठानिएको छ । गत वर्षको बजेटमा भने सुरुमा ८ अर्व भारु (१२ अर्व ८० करोड रुपैयाँ) मात्र विनियोजन गरिएको थियो । गतवर्ष भने अघिल्लो वर्षको तुलनामा नेपाललाई दिने अनुदानमा करिब आधाले नै घटाइएको थियो । भारतले सन् २०१९/२१ का लागि करिब १२ अर्व भारु अनुदान दिएकोमा गत वर्ष अर्थात् सन् २०२०/२१ का लागि ८ अर्व भारु मात्र विनियोजन गरेको थियो । पछि बजेटमा विनियोजितभन्दा थप ८० करोड भारु नेपाललाई दिइएको भारतको अर्थ मन्त्रालयको बजेट विवरणमा उल्लेख छ ।

भारत सरकारले विदेश मन्त्रालयमार्फत् नेपाललाई वित्तीय सहयोग गर्दै आएको छ । विगतका वर्षहरुमा जस्तै भारतबाट अनुदान पाउनेमा यसवर्ष पनि भुटान पहिलो नम्बरमा छ । भुटानका लागि ३० अर्व भन्दा बढी अनुदान दिइने जनाइएको छ । भारतले श्रीलंकालाई दिने अनुदानमा भने उल्लेख्य वृद्धि गरेको छ । गत वर्ष ७५ करोडमात्र अनुदान दिइएकोमा यस वर्ष त्यसलाई बढाएर २ अर्व भारु पुर्‍याइएको छ ।