">
म्यानमार । म्यानमारमा सैन्य कू गर्दै सांसद्हरुलाई बन्दी बनाइएपछि म्यानमारका ३०० सांसद्हरुले जुन्ता शासन खारेजको माग गर्दै एक घोषणापत्रमा हस्ताक्षर गरेका छन् । गत नोभेम्बरको भएको आमा निर्वाचनमा धाँधली भएको आरोप लगाउँदै म्यानमारको सेनाले फ्रब्रुअरी १ मा निर्वाचित सरकारलाई अपदस्त गर्दै सांसद्हरुलाई नियन्त्रणमा लिनुका साथै सैन्य शासन सञ्चालन गरेको थियो । म्यानमारमा सैन्य कूपछि चर्को विरोध प्रदर्शनहरुसमेत भइरहेका छन् ।
उक्त विरोध प्रदर्शनमा सेनाले बल प्रयोग गरेपछि प्रदर्शनहरु हिंसात्मक बनेका छन् । यससँगै सुरक्षा अधिकारीहरुले सयौंलाई विभिन्न अपार्टमेन्टमा बन्धकसमेत बनाएको छ । संयुक्त राष्ट्रसंघले बन्धक बनाइएका प्रदर्शनकारीहरुलाई रिहा गर्न म्यानमार सेनासँग आग्रह गरेको छ । म्यानमारमा सैन्य शासनविरुद्धको प्रदर्शनहरु बढ्न थालेपछि सैन्य शासकले प्रदर्शनकारीहरुलाई अपार्टमेन्टमा ‘बन्धक’ बनाइएर राखेको छ । म्यानमारको ठूलो सहर योङ्गुनस्थित एक अपार्टमेन्टमा सुरक्षकर्मीले करिब २०० प्रदर्शनकारीलाई एकत्रित गरेर ‘बन्धक’ बनाएको छ । उनीहरुलाई त्यहाँबाट निस्किन दिइएको छैन ।
संयुक्त राष्ट्रसंघको मानवअधिकार कार्यालयका अनुसार उनीहरुले शान्तिपूर्ण रुपमा प्रदर्शन गरेका थिए । सोही कारण उनीहरुलाई सहज रुपमा छोडिनु पर्ने कार्यालयको भनाइ छ । नोभेम्बरमा भएको निर्वाचनमा सेना समर्थित दलले पराजय व्यहोरेपछि धाँधली भएको आरोप लगाइरहेको सेनाले फेब्रुअरी १ मा निर्वाचित सरकारलाई अपदस्त गरि सत्ता हातमा लिएको थियो । उक्त सैन्य कू विरुद्ध म्यामारमा लगातार प्रदर्शनहरु भइरहेका छन् । प्रदर्शनमा सुरक्षाकर्मीको बल प्रयोगका कारण हालसम्म ५५ जनाको मृत्यु भइसकेको राष्ट्रसंघीय मानवअधिकार आयोगले जनाएको छ ।
