• सुदर्शन श्रेष्ठ/अर्थ सरोकार सुदूरपश्चिम ब्युरो

धनगढी । लकडाउनको दोस्रो दिन शुक्रबार एकाबिहानै बजारमा मानिसहरुको आवतजावत र चहलपहल निकै देखिन्थ्यो । जिल्ला प्रशासन कार्यालय कैलालीले आदेश जारी गर्दै अत्यावश्यक काम बाहेक अन्य समयमा बाहिर ननिस्किनका लागि जिल्लाबासीमा आग्रह गरेको र प्रहरीको उपस्थिति बलियो भएकाले पनि बजार क्षेत्र केही सुनसान जरुर देखिन्थ्यो । तर ग्रामीण क्षेत्रमा भने अवस्था ठ्याक्क विपरित थियो ।

धनगढी उपमहानगरपालिका वडा नं.१४, १५, १६, १८, १२ (फुलवारी, कनरी, जुगडा) लगाएतका क्षेत्रमा अधिकांश नागरिक बिना मास्क घुमिरहेका देखिन्थे । युवाहरु जमघट गर्दै क्यारम खेल्दै देखिन्थे भने वृद्धवृद्धाहरु चिया पसलमा गफगाफ गर्दै देखिन्थे । यता प्रशासनले आदेशको उल्लंघन गरेमा संक्रामक रोग ऐन अनुसार कारवाही गर्ने बताईरहँदा ग्रामीण क्षेत्रका नागरिक भने निष्फिक्रि देखिन्छन् । कोरोनाको संक्रमणमा किन यस्तो लापरवाही ? भन्ने हाम्रो प्रश्नमा स्थानियको जवाफ थियो, ‘लकडाउन कागजमा छ भएपनि केहि शहरमा छ तर गाउँमा प्रभाव भने शुन्य छ ।’

‘कैलाली प्रशासनको लकडाउन शहर केन्द्रित भयो’, धनगढी १२ का स्थानिय सुनिल बस्नेतले भने, ‘गाउँमा प्रशासनको उपस्थिति शुन्य हुँदा लापरवाही पनि त्यत्तिकै मात्रामा बढेको छ ।’ उनले थपे, ‘हामीले त लकडाउन पालनाको लागि अपिल गरेकै छौँ तर स्थानियको कुरा स्थानियले नै मान्न ग्रामिण क्षेत्रमा गाह्रो छ । प्रहरी देख्दा सचेत हुन्छन् तर प्रहरीको उपस्थिती शहरमा मात्रै छ ।’

कोरोना संक्रमणको चेन ब्रेक गर्नका लागि कैलालीमा लकडाउन गरिएको हो तर दिनभरी लकडाउन गरेजस्तो गर्ने बिहान र साँझ सबै सेवा सञ्चालन र भिडभाड गर्दा जोखिम बढ्ने र जनता मार्ने काम गरेको स्थानियको आरोप थियो । ‘यो त प्रशासनको केटाकेटीपन हो’, धनगढी १८ का स्थानिय सुनिल विकले भने, ‘यसरी संक्रमण नियन्त्रण हुँदैन ।’

कोरोनाको दोस्रो लहर सूरु भएसँगै सुदूरपश्चिमका दुई जिल्ला कैलाली र कञ्चनपुरमा निषेधाज्ञा जारी गरिएको छ । तर जिल्ला प्रशासन कार्यालयले आदेश पुर्ण रुपमा प्रभावकारी ढंगबाट कार्यान्वयन नहुँदा जोखिम भने यथावत रहेको छ ।