• अर्थ सरोकार सम्बाददाता 

काठमाडौं ।  नेपाल फाइनान्स र ललितपुर फाइनान्सले एकैसाथ जेठ २८ गते विशेष साधारणसभा बोलाएका छन् ।  नेपाल फाइनान्सले ललितपुर फाइनान्सलाई एक्वायर गर्ने विशेष प्रस्ताव पारित गर्न दुवैले एकैदिन सभा बोलाएका हुन् ।  

नेपाल फाइनान्सको सभा संस्थाको केन्द्रीय कार्यालय कमलादीमा बिहान ११ बजे सुरु हुनेछ भने ललितपुर फाइनान्सको सभा पनि केन्द्रीय कार्यालय लगनखेलमा बिहान ११ बजे सुरु हुनेछ । साथै सभामा सम्पति तथा दायित्व मूल्याङ्कन प्रतिवेदनका आधारमा निर्धारण गरिएको १ः१ सेयर स्वाप रेसियोलाई पारित गरी एक्विजिसन सम्बन्धी कार्यलाई अन्तिम स्वीकृति दिने एजेन्डा रहेको छ । अहिले ललितपुर फाइनान्सको १ कित्ता सेयर हुने लगानीकर्ताले एक्विजिसनपछि नेपाल फाइनान्सको १ कित्ता सेयर पाउनेछन् । 

सभाले एक्विजिसन सम्बन्धी समझदारीपत्र, निर्णय तथा अन्तिम सम्झौताहरुको अनुमोदन पनि गर्नेछ । एक्वायरपछि प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्ताव पेश हुनेछ ।यी दुवै संस्थाले गत पुस २३ गते एक्विजिसन सम्बन्धी सहमतिपत्रमा हस्ताक्षर गरेका थिए ।