नयाँ दिल्ली । कोरोना महामारीको दोस्रो लहरले अहिले भारत सबैभन्दा बढी प्रभावित भएको छ । भारतमा कोरोना संक्रमितको संख्या दैनिक ४ लाख पुग्न थालेको छ । यो विश्वमै एकैदिन सबैभन्दा बढी कोरोना संक्रमित देखिएका हुन् । यसअघि कोरोनाको पहिलो लहरविरुद्ध लड्नका लागि भारत सरकारले विश्वभरका मुलुकहरुमा कोरोनाविरुद्धको खोप अनुदानमा उपलब्ध गराउँदै आएकोमा हाल भारत आफैं समस्यामा परेको छ । यस्तो अवस्थामा यसअघि भारतले सहयोग पुर्याएका मुलुकहरुले भारतलाई सहयोग गरिरहेका छन् ।

पछिल्लो केही वर्ष यता भारत र इजरायलबीचको सम्बन्धमा निकै सुधार आएको छ । यसअघि भारतले इजरायललाई कोरोनाविरुद्धको खोप तथा अन्य स्वास्थ्य सामग्रीहरु र कारोनाविरुद्ध प्रभावकारी मानिएको औषधि उपलब्ध गराएको थियो । कोरोना महामारीको संकटको समयमा इजरायलले पनि भारतलाई आफ्नो मित्रतालाई थप सुदृढ भएको प्रमाणित गर्ने समय आएको छ ।

भारतमा कोरोना भाइरस संक्रमितहरुको संख्या बढ्दै जाँदा अस्पतालहरु पनि भरिएका छन् । पहिलो लहरको तुलनामा हाल युवा पुस्ताका कोरोना संक्रमितहरुको संख्या बढ्न थालेको छ । कोरोना भाइरस महामारीविरुद्ध लड्न विश्वलाई खोप वितरण गरेको भारतमा हाल खोप अभाव हुन थालेको छ । अस्पतालका बेडहरु भरिएको छन् भने अक्सिजन सिलिन्डर भरिएका छन् । अस्पतालहरुको अवस्था हेर्दा अवस्था निकै नाजुक छ ।

यस्तो अवस्थामा इजरायल डिफेन्स फोर्सले कोरोना महामारीबाट बढी प्रभावित भएका सहरहरुमा अस्थायी उपचार शिविर स्थापना गरेर सेवा प्रदान गरिरहेका छन् । सन् २०१० मा हाइटीमा गएको भूकम्पमा पनि उद्धारमो पहिला मैदानमा खटिनेमा इजरायल सेना नै थियो । सन् २०१५ मा नेपालमा आएको भूकम्पमा पनि इजरायलले औषधिसहित ठूलो सहयोग गरेको थियो । हाल कोरोना संकटका समयमा इजरायलले भारतलाई सहयोग गरिरहेको छ ।