- अर्थ सरोकार सम्बाददता
काठमाडौं । चालु आर्थिक वर्षको तेस्रो त्रैमासमा सोल्टी होटलले १३ करोड ६६ लाख ३८ हजार रुपैयाँ खुद नोक्सानमा गएको वित्तीय विवरण सार्वजनिक गरेको छ । कोरोनाको प्रत्यक्ष प्रभावमा होटल क्षेत्र परेकाले वित्तीय विवरण यस्तो देखिएको हो । गत वर्षको यसै अवधिमा होटलले १४ करोड ५ लाख ४७ हजार रुपैयाँ खुद नाफा गरेको थियो ।
यस्तै चैत मसान्तसम्म सोल्टीको आम्दानी ७३.५४% ले घटेर ३० करोड ८७ लाख ४७ हजार रुपैयाँमा सीमित भएको छ । सञ्चालन नोक्सान १३ करोड ६२ लाख २७ हजार रुपैयाँ रहेको छ । यद्दपि, यस अवधिमा संस्थाको मौज्दात र तरलता औसत नै रहेको सोल्टीको व्यवस्थापन पक्षले जानकारी गराएको छ ।
चुक्ता पूँजी ८४ करोड २५ लाख ७९ हजार रुपैयाँ रहेको सोल्टीको रिजर्भ कोषमा ६७ करोड ५ लाख ६७ हजार रुपैयाँ छ । होटलको प्रतिसेयर १ रुपैयाँ ६२ पैसा नोक्सानमा छ भने प्रतिसेयर नेटवर्थ पनि २३ रुपैयाँ १ पैसाबाट घटेर १७ रुपैयाँ ९६ पैसामा आएको छ ।
