- अर्थ सरोकार सम्बाददाता
काठमाडौं । एनआइसी एसिया बैंकले आज मंगलबारदेखि आफ्नो स्वामित्वमा रहेको संस्थापक सेयर लिलामीमा बिक्री खुला गरेको छ । बैंकले आफ्नो स्वामित्वमा रहेको आरएमडीसी लघुवित्त, मेरो माइक्रोफाइनान्स र महुली लघुवित्तको संस्थापक सेयर लिलामी बिक्री खुला गरेको हो ।
कैंयौपटक लिलामीमा ल्याउँदा बिक्री नभएपछि पुन: आरएमडीसीको ३ लाख ८४ हजार ९९५, मेरोको ५८ हजार ५६८ र महुलीको ५५ हजार कित्ता सेयर लिलामीमा ल्याएको हो । लगानीकर्ताले आरएमडीसीको सेयरमा न्यूनतम ४४१ रुपैयाँ, मेरोको सेयरमा ५३१ रुपैयाँ र महुलीको सेयरमा न्यूनतम ७३० रुपैयाँ भाउ राखेर आवेदन दिन सक्नेछन् ।
यो सेयर खरिदका लागि विद्यमान संस्थापकहरु वा जो कोही व्यक्ति, कम्पनी, संघ, संस्थाहरुले आवेदन दिन सक्नेछन् । यसमा असार २१ गतेसम्म बोलपत्र पेश गर्न सकिनेछ भने न्यूनतम १०० कित्ता वा अधिकतम सम्पूर्ण कित्ताका लागि पनि आवेदन दिन सकिनेछ ।
