• अर्थ सरोकार सम्बाददाता 

काठमाडौं । पछिल्लो समय वैदेशिक रोजगारीमा जानेको संख्या ह्वात्तै घटेको छ । विश्वभर फैलिएको कोरोना भाइरसको संक्रमणका कारण वैदेशिक रोजगारीमा जानेको संख्या ६० प्रतिशतले घटेको पाइएको हो । 

गत वर्षको १० महिनाको तुलनाको अवधिमा चालु आवको सोही अवधिमा ६० प्रतिशतले वैदेशिक रोजगारीमा जानेको संख्या घटेको नेपाल राष्ट्र बैंकले सार्वजनिक गरेको तथ्याङ्कमा छ । 

सामान्य अवस्थामा भने करिब ४ लाखदेखि ५ लाखको संख्यामा नेपाल वैदेशिक रोजगारीको शिलशिलामा विभिन्न मुलुक पुग्ने गरेका थिए । तर कोरोनाको संक्रमणले त्यो संख्या घटेको छ ।  

यता आर्थिक वर्ष २०७६/७७ को १० महिनामा १ लाख ९३ हजार ८ सय ८० नेपाली श्रमिक नयाँ श्रम स्वीकृति लिएर विदेशिएका थिए । चालु आवको सोही अवधिमा भने ७७ हजार १२ जना मात्रै विदेशिएको बताइएको छ । यस्तै विदेशबाट विदामा आएका र पुनः श्रम गर्न जानेको संख्या पनि चालु आवमा ४९ प्रतिशतले घटेको राष्ट्र बैंकको तथ्यांकमा छ ।