काठमाडौं । मञ्जुश्री फाइनान्स लिमिटेडले संस्थापक समूहको सेयर बिक्री गर्ने भएको छ । कम्पनीले १२ हजार ५८७ कित्ता संस्थापक सेयर बिक्री गर्ने भएको हो । संस्थाले जारी गरेको सूचना अनुसार उक्त संस्थापक सेयरको प्रतिकित्ता न्यूनतम मूल्य ३०० रुपैयाँ तोकिएको छ । संस्थापक सेयर बोलकबोलको माध्यमबाट न्यूनतम १०० कित्ता र अधिकतम सेयर संख्याको लागि कुनै हद नलाग्ने कम्पनीले जनाएको छ ।

साथै संस्थापक सेयर खरिदका लागि इच्छुक तथा योग्यता पुगेका विद्यमान संस्थापकहरु वा जो कोही व्यक्ति, कम्पनी, संघ, संस्थाहरुले मिति २०७८ श्रावण १४ गते देखि मिति २०७८ भाद्र ८ गते सम्म आवेदन दिन सक्ने भएका छन् । आवेदकले बिक्री प्रबन्धक एनआईबिएल एस क्यापिटल लिमिटेड लाजिम्पाट काठमाडौंमा आइपुग्ने गरी प्रतिकित्ता आफूले लिन चाहेको दर रेटका साथ सम्पूर्ण विवरण खुलाई गोप्य शिलबन्दी बोलपत्रमार्फत आवेदन दिनु पर्नेछ ।