एशोशिएसनका वीरगञ्ज च्याप्टरका सदस्यसमेत रहेको डाइनामिक कन्सल्टेन्सी एण्ड कन्सट्रक्सन सर्भिसेजले कुमारी बैंकबाट उपलब्ध गराएको कागजातका आधारमा मूल्यांकन गरे पनि केन्द्रीय अनुसन्धान व्यूरोले ईञ्जिनियरलाई पक्राउ गरेकोमा एशोसिएशनले विरोध गरेको छ । सीआइबीले भ्यालुअरलाई पक्राउ गरेपछि एशोसिएशनले बुधबारदेखि बैंक तथा वित्तिय संस्थाहरूमा मूल्यांकनका सम्पूर्ण कार्य बन्द गरेको छ । प्रहरीको केन्द्रीय अनुसन्धान व्यूरोले डाइनामिक कन्सल्टेन्सीका सञ्चालक राजेशकुमार चौरासियालाई नियन्त्रणमा लिएपछी एसोसिएसनले त्यसको विरोध गरेको हो । कुमारी बैंकबाट नक्कली जग्गा उपर कर्जा दिएको प्रकरणमा भ्यालुअर चौरासियालाई अनुसन्धानका लागि भन्दै प्रहरीले नियन्त्रणमा लिएको थियो । हाल उनी हिरासतमै छन् ।

भ्यालुअरले भ्यालुएसन गर्दा उपलब्ध कागज र फिल्ड हेर्ने हो । यहाँ कागज ठिक हो कि होइन भन्ने विषय भ्यालुअरको दायित्वभित्र नै पर्दैन । तर यो मान्यताविपरित कर्जा अन्तिम स्वीकृति गर्ने उपल्लो तहका कर्मचारीहरुलाईचाहिं पक्राउ नगर्ने अनि तलतलका कर्मचारीहरुलाई पक्राउ गरेर भ्यालुअरलाई समेत दोषी देखाउनु गलत भएको भन्दै एसोसिएसन विरोधमा उत्रिएको हो ।

यता एसोसिएसनका अध्यक्ष ऋषि कोइरालाले विज्ञप्ति निकालेर आन्दोलनलाई थप शशक्त र प्रभावकारी बनाउन थप आन्दोलन कार्यक्रमसमेत घोषणा गरिने चेतावनी दिएका छन् । उनले तत्काल आफ्ना सदस्य साथीको रिहा नगरे देशभर आन्दोलन गर्ने चेतावनीसमेत दिएका छन् । ‘जवर्जस्ती हामीलाई बदनाम गराएर दोषीलाई पानीमाथिको ओभानो बनाउने दुष्प्रयास भएको छ । यसका विरुद्ध हामी शशक्त भएर लाग्छौं ।’ कोइरालाले अर्थ सरोकारसँग भने, ‘हाम्रो सांकेतिक आन्दोलनलाई प्रवाह नगरेको खण्डमा हामी थप शशक्त भएर आउनुको विकल्प छैन ।’

यता पक्राउ परेका चौरासियाले लेख्दै यो प्रकरणमा आफ्नो भनाई राखेका छन् । उनले नेपाल भ्यालुअर्स एसोसिएसनलाई पत्र लेख्दै कुमारी बैंकद्वारा कर्जा प्रवाह सम्बन्धि विवादबारे सम्बन्धित कागजात बैंकले मेलमार्फत पठाएको उल्लेख गर्दै यसमा आफ्नो केहि पनि गल्ती नभएको दाबीसहित पत्र लेखेपछि संघले उनलाई समर्थन गरी सदस्यको हकहितका लागि आन्दोलन गरेको हो । हेर्नुहोस् चौरासियाले लेखेको पत्र :

कुमारी बैंकबाट नक्कली कागजका आधारमा १९ करोड ऋण झिकिएको छ । जसमा घटनाका मुख्य योजनाकार कुसन प्रधान देखिएका छन् । हाल कुमारीमा रहेका अनुजमणि तिमिल्सीना उनका पूराना रुममेट हुन्। तिमिल्सीनालाई कागज नक्कली हो भन्ने थाहा हुँदाहुँदै ऋण दिएको आरोप लागेको छ । यद्यपी यो प्रकरणमा सीआइबीले उनीमाथि उनलाई पक्राउ नै नगरी छानविन गरिरहेको छ । अर्कोतर्फ उनलाई बैंक संचालक समितिले अझै पनि पदमा नै राखिरहेको छ । जसका कारण प्रमाण नष्ट हुने वा गलत मान्छेलाई फसाउने गरी फर्जी प्रमाणहरु तयार हुने आशंका धेरैको छ । अर्कोतर्फ नेपाल राष्ट्र बैंकले भने कामु र डेपुटी सीइओलाई बैंक छोडेर अनुसन्धानमा सहयोग गर्न भनेको बुझिएको छ ।