काठमाडौं । प्राइम कमर्सियल बैंकले वार्षिक साधारणसभा डाकेको छ । कम्पनीले पुस ६ गते १४औं वार्षिक साधारणसभा डाकेको हो । उक्त सभा बैंकको प्रधान कार्यालय कमलपोखरी काठमाडौंमा बिहान ११ बजेदेखि सुरु हुने भएको छ । सभामा भिडियो कन्फ्रेन्समार्फत सहभागी हुने सेयरधनीलाई बैंकले पासवर्ड उपलब्ध गराउने भएको छ । सभामा बैंकले गत आर्थिक वर्षको नाफाबाट लगानीकर्तालाई १६.६३१ प्रतिशत लाभांश वितरण गर्ने विशेष प्रस्ताव पेश हुनेछ ।

बैंकले गत वर्षको नाफाबाट १६ प्रतिशत बोनस सेयर र कर प्रयोजनका लागि ०.६३१३ प्रतिशत नगद लाभांश वितरण गर्ने निर्णय गरेको हो । बोनस वितरणपछि चुक्ता पुँजी वृद्धि हुने भएकोले प्रबन्धपत्र तथा नियमावली संशोधन गर्ने एजेण्डा पनि रहेको छ । यसैगरी अन्य बैंक तथा वित्तीय संस्थाहरुसँग गाभ्ने/गाभिने सम्बन्धि सम्पूर्ण कार्य गर्न सञ्चालक समितिलाई अख्तियारी प्रदान गर्ने प्रस्ताव पनि रहेको छ ।

आर्थिक वर्ष २०७७/७८ को वासलात, नाफा-नोक्सान र नगद प्रवाहमाथि छलफल हुने भएको छ । आर्थिक वर्ष २०७८/७९ का लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेण्डा पनि रहेको छ । सभा तथा लाभांश वितरण प्रयोजनार्थ बैंकले मंसिर २२ गते बुक क्लोज गर्ने भएको छ । तसर्थ मंसिर २१ गतेसम्म नेप्सेमा कायम सेयरधनीले मात्र लाभांश सुरक्षित गर्न सक्नेछन् ।