काठमाडौं । सेञ्चुरी बैंक र ग्रिन हिल सिटीको मिलेमतोमा भएको घोटाला छानविन गर्न उच्च अदालत पाटनले अन्तरिम आदेश जारी गरेको छ । बैंक र ग्रिन हिल सिटीको मिलेमतोमा भएको १ करोड रुपैयाँ कीर्ते कर्जा प्रवाह काण्डको छानविन गर्न नेपाल राष्ट्र बैंकको नाममा उच्च अदालत पाटनले अन्तरिम आदेश जारी गरेको हो ।
पीडित शान्ता शर्माका वारेस अधिवक्ता सुमन न्यौपानेले दायर गरेको रिटमाथि सनुवाई गर्दै उच्च अदालत पाटनका न्यायाधिश नृपध्वज निरौलाको इजलाशले बिहिबार नेपाल राष्ट्र बैंकको नाममा अन्तरिम आदेश जारी गरेको हो । सेञ्चुरी बैंक र ग्रिन हिल सिटीलाई पनि उपस्थित हुन सर्वोच्च अदालतले आदेश दिएको छ ।
यही मंसिर १४ गते दायर गरिएको रिटमा सेन्चुरी बैंकले ऋणीको नाममा ऋण प्रवाह नगरी ठगी गरेको भन्दै नेपाल राष्ट्र बैंकमा पटक पटक उजुरी गरेको थियो । सोही उजुरीको कुनै सुनुवाई नहुँदा छानविन तथा सो ऋण सम्बन्धि प्रक्रिया यथास्थितिमा राख्न अन्तरिम आदेश माग गर्दै रिट दायर गरिएको थियो । नेपाल राष्ट्र बैंकलाई समेत उच्च अदालत पाटनले छानविन नगर्नुको कारणसहित उपस्थित हुन आदेश दिएको छ।
