काठमाडौं । सेयर लगानीकर्ताहरुले पूँजीबजार विरोधीलाई ‘नो भोट’ अभियान चलाएका छन् । नेपाली सेयर बजारलाई बेवास्ता गर्ने राजनीतिक दल र तिनका नेताहरुलाई भोट नदिने अभियान अन्तर्गत  सामाजिक सञ्जालमार्फत यो अभियान चलिरेको छ । लगानीकर्ताहरुले ‘पुँजी बजार विरोधीहरुलाई आगामी चुनावमा ‘नो भोट, ४५ लाख लगानीकर्ताको आवाज’ लगायतका विभिन्न खालको स्लोगन राख्दै फेसबुक लगायतका समाजिक सञ्जालमा सेयर र प्रचारप्रसार गरिरहेका छन् । ४५ लाखभन्दा बढी व्यक्ति पुँजी बजारमा जोडिएकाले यो अभियानले खास अर्थ राख्ने लगानीकर्ताहरुको बुझाई छ ।

यता यो अभियानका अभियानतामध्येका एक हरि ढकालले अर्थमन्त्रीले सेयर बजार नै नबुझेको बताएका छन् । अर्थ सरोकारको साप्ताहिक टेलिभिजन कार्यक्रम ‘मार्केट टक’मा बोल्दै उनले अर्थमन्त्री जनार्दन शर्माले सेयर बजार नै नबुझेकाले अव आफुहरुले अर्थमन्त्रीलाई बजार बुझाउने दाबी गरेका छन् ।

‘अर्थमन्त्रीले सेयर बजार नै बुझेनन् । अव हामी बुझाउँछौं ।’ उनले भने -‘नेपालको ठुलो पार्टीकै पार्टी सदस्यता झन्डै १० लाख मात्र हो । हामी त यहाँ ४५ लाख लगानीकर्ता छौं । यसले ठुलो अर्थ पक्कै राख्छ ।’ हेरौं उनको सो अभिव्यक्तिसहितको कार्यक्रम ‘मार्केट टक’