काठमाडौं । नेपाल राष्ट्र बैंकका गभर्नर महाप्रसाद अधिकारीको मुद्दा सुनुवाइ हुने भएको छ । गभर्नर अधिकारीको मुद्दा आज बिहीबार न्यायाधीश सपना मल्ल प्रधान र टंकबहादुर मोक्तानको इजलासमा सुनुवाइ हुने भएको हो ।
गत मंगलबारदेखि न्यायाधीशद्वयको इजलासमा गभर्नर अधिकारीको मुद्दाको सुनुवाइ सुरु भएको थियो । मंगलबार गभर्नर अधिकारीका तर्फबाट बहस भएको थियो भने आज सरकारतर्फबाट बहस भैरहेको छ । मंगलबार समय अभावले यो मुद्दालाई हेर्दाहेर्दैमा राखिएको थियो ।
गभर्नर अधिकारीलाई महत्वपूर्ण सूचनाहरु चुहाएको आरोपमा मन्त्रिपरिषद्को गत चैत २५ गते बसेको बैठकले निलम्बन गरेको थियो । त्यसपछि अधिकारीले आफूलाई हटाउन कानुनविपरीत आएको भन्दै पुनर्बहालीको माग गर्दै सर्वोच्च अदालतमा रिट दायर गरेका थिए ।
अधिकारीको रिटमाथि सुनुवाइ गर्दै गत वैशाख ६ गते न्यायाधीश हरिप्रसाद फुयालको एकल इजलासले उनीमाथि कुनै कारबाही अगाडि नबढाउन अल्पकालीन अन्तरिम आदेश दिएको थियो । आजको बहसपछि अदालतले अल्पकालीन अन्तरिम आदेशलाई निरन्तरता दिने किन नदिने भन्ने विषयको टुङ्गो लाग्नेछ ।
