काठमाडौं । नेपाल राष्ट्र बैंकले पेट्रोलियम पदार्थको आयात घटाउन सरकारलाई सुझाव दिएको छ । राष्ट्र बैंकले गत चैत १६ गते अर्थ मन्त्रालयमा लिखित सुझाव पठाउँदै पेट्रोलियम पदार्थको आयात आधा भन्दा धेरै घटाउन सुझाव दिएको हो ।
सुझाव पत्रको ४ नम्बर बुँदामा राष्ट्र बैंकले मासिक १२ देखि १३ अर्ब रुपैयाँ बराबर मात्रै भुक्तानी हुने गरी पेट्रोलियम पदार्थको आपूर्ति व्यवस्थापन मिलाउनु पर्ने उल्लेख छ । राष्ट्र बैंकको प्रस्तवा अनुसार पेट्रोलियमको पदार्थको आपूर्ति कम गर्ने निर्णय हुबहु कार्यान्वयन भएमा हालको पेट्रोलियम आयातमा आधा भन्दा बढी कटौती हुनेछ ।
पछिल्ला महिनाहरुमा पेट्रोलियम पदार्थ खरिद गरेबापत आयल निगमले भारतीय आयल निगमलाई मासिक कम्तीमा २४ देखि २९ अर्ब रुपैयाँसम्म रकम भुक्तानी गर्दै आएको छ । गत मार्च महिनामा निगमले २९ अर्ब रुपैयाँको पेट्रोलियम खरिद गरेको थियो ।
