काठमाडौं । रियल टाइम ग्रस सेटेलमेन्ट (आरटीजीएस प्रणालीमा थप चार वटा बैंक तथा वित्तीय संस्थाहरु आबद्ध भएका छन् । राष्ट्र बैंकका अनुसार मितेरी डेभलपमेन्ट बैंक, नेपाल फाइनान्स, श्री इन्भेस्टमेन्ट एन्ड फाइनान्स कम्पनी र समृद्धि फाइनान्स कम्पनी लिमिटेड आरटीजीएस प्रणालीमा आबद्ध भएका हुन् । केन्द्रीय बैंकले जेठ ४ गतेदेखि थप ४ कम्पनी आवद्ध भएको जनाएको हो ।

नेपाल राष्ट्र बैंकको आरटीजीएस प्रणाली विस्तार गर्ने क्रमलाई निरन्तरता दिँदै नेपाल क्लियरिङ्ग हाउस लिमिटेडले वाणिज्य बैंक, विकास बैंक तथा फाइनान्स कम्पनीहरुलाई  राष्ट्र बैंकबाट सञ्चालित आरटीजीएस प्रणालीमा आवद्ध गराउँदै आएको छ । आरटीजीएस प्रणाली लागू भएसँगै चेक नकाटी सीधै एक बैंकको खाताबाट अर्को बैंकको खातामा भुक्तानी हुने गरेको छ ।

राष्ट्र बैंकले सम्पूर्ण वाणिज्य बैंकका ग्राहकहरुलाई २ लाख वा सो भन्दा बढी रकमको कारोबारमा यो प्रणालीको प्रयोग गर्न अनुरोध गर्दै आएको छ । २० लाखभन्दा बढीको कारोबार गर्दा अनिवार्य आरटिजिएस सिस्टममार्फत भुक्तानी गर्नुपर्ने व्यवस्था गरिएको छ ।