">
काठमाडौं । सेयर बजारका दलालहरुले काठमाडौंमा फुटसल खेलाउने भएको छ । पुँजी बजारका सम्पूर्ण निकायहरूलाई समेटेर स्टक ब्रोकर एसोसिएसन अफ नेपाल ‘एसबीएएन’ले ‘एसबीएएन क्यापिटल मार्केट कप २०२२’ को आयोजना गर्ने भएको हो ।
एसबीएएनले ‘फुटसल फोर युनिटी’ को नारासँगै नेपालमै पहिलो पटक पुँजी बजारसँग सम्बन्धित सम्पूर्ण निकायहरूलाई समेटी फुटसल खेलाउने भएको हो । उक्त प्रतियोगिता जेठ २८ गते शनिबारदेखि चण्डोलस्थित ढुकु फुट्सल हबमा सुरु हुने भएको छ । ४ दिनसम्म सञ्चालन हुने उक्त प्रतियोगिताको व्यवस्थापन इभेन्ट कोर्ट प्राइभेट लिमिटेडले गर्ने भएको छ ।
प्रतियोगितामा सेबोन, सीडीएस एन्ड क्लियरिङ लिमिटेड, धितोपत्र दलाल व्यवसायी, मर्चेन्ट बैंक, क्रेडिट रेटिङ एजेन्सि, निक्षेप सदस्यलगायत अन्य पुँजी बजारसँग सम्बन्धित ३६ निकायका टिमको सहभागिता रहने भएको छ । प्रतियोगितामा बैंकिङ पार्टनरका रूपमा ग्लोबल आईएमई बैंक, मिडिया पार्टनर मेरो लगानी डट कम र वेब पार्टनरमा गोल नेपाल डट कम रहेको छ ।
एसबीएएनका अनुसार प्रतियोगितामा जर्सि नेपाल पसल तथा बेन्चवार्मर्स नेपालको पनि सहयोग रहने भएको छ । धितोपत्र बजारसँग सम्बन्धित सम्पूर्ण सरोकारवाला निकायहरूबीचको सम्बन्धलाई प्रगाढ बनाउने यो प्रतियोगिता हरेक वर्ष आयोजना गरिने एसबीएएनले जनाएको छ ।
