काठमाडौँ । हिमालयन बैंक लिमिटेड र सिभिल बैंक लिमिटेड अन्तत: एक आपसमा गाभिने भएका छन् । बैंकको अद्ध्यक्ष, सीइओ, स्टाफ एडजष्टमेन्ट लगायतका सबै विषयमा टुंगो लगाएर अन्तत दुई बैंक एक आपसमा समाहित हुने टुंगोमा पुगेका हुन् । नेपाल इन्भेष्टमेन्ट बैंकसँग मर्जर टुटेपछि हिमालयनले सिभिलसँग मर्जरको लागि कुरा अघि बढाएको थियो । सिभिल र हिमालयनको सबै पक्षमा कुरा मिलिसकेको सिभिलका एक संचालकले पुष्टी गरे ।
‘अध्यक्ष को हुने, सीइओ को हुने, स्टाफ एडजष्टमेन्ट के हुने, सबै फाइनल भईसकेको छ । सम्भवत: केहि दिनमा मर्जर सम्झौता हुनेछ ।’ ती संचालकले भने, ‘सबै कुरो टुंगो लागेको छ, केहि दिनमा तपाईंहरुलाई औपचारिक सम्मेलनका लागि निम्तो दिनेछौं। ‘ हुन लागेको सम्झौता अनुसार अव बैंकको नाम हिमालयन सिभिल बैंक लिमिटेड रहनेछ । बैंकको अहिलेकै अध्यक्षले निरन्तरता पाउनेछन् भने सीइओ पनि हिमालयनकै तर्फबाट हुनेछन् ।
हिमालयन बैंकमा हबिब बैंकपछिको दोस्रो ठुलो सेयरधनी रहेको कर्मचारी संचय कोषको लगानी सिभिल बैंकमा पनि भएकोले पनि सहज रुपमा सबै कुरा अगाडी बढेको ती संचालकको तर्क छ । ‘एकातिर हिमालयनलाई कुनै बैंकसँग मर्जरमा जानुपर्ने बाध्यता थियो, हामीले पनि पार्टनर पायौँ । सबै कुरा मिलिसक्यो । स्टाफ एडजष्टमेन्टमा सानो इस्यु छ, त्यो पनि समाधान भईहाल्छ ।’ उनले भने ।
नियामक नेपाल नेपाल राष्ट्र बैंकले मर्जरको लागि दिइएका छुट सुविधाहरु यहि असारसम्म मात्र दिने भनेपछि अहिले बैंकहरु मर्जर तथा प्राप्तिका लागि तातिएका छन् ।
