काठमाडौं । लुम्बिनी विकास बैंकको खुद नाफामा ५५.६९ प्रतिशतले वृद्धि भएको छ । बैंकले प्रकाशित गरेको गत आर्थिक वर्षको चौथो त्रैमासिकसम्मको वित्तीय विवरणअनुसार बैंकले अघिल्लो आर्थिक वर्षको तुलनामा ५५ प्रतिशत बढी खुद नाफा कमाएको हो । गत आर्थिक वर्षमा बैंकले ६७ करोड ५६ लाख रुपैयाँ खुद नाफा कमाएको छ । अघिल्लो वर्षको सोही अवधिमा बैंकको खुद नाफा ४३ करोड ३९ लाख रुपैयाँ रहेको थियो ।
खुद ब्याज आम्दानी बढेसँगै निष्क्रिय कर्जा घटेका कारण बैंकको नाफा उल्लेख्य बढ्न पुगेको बैंकले जनाएको छ । त्यस्तै गत आर्थिक वर्षको असार मसान्तसम्ममा बैंकको खुद ब्याज आम्दानी ३०.१५ प्रतिशतले बढेको छ । यता बैंकको खुद फि तथा कमिसन आम्दानी भने १०.९८ प्रतिशत घटेको छ । त्यस्तै बैंकको कुल सञ्चालन आम्दानी १६.९२ प्रतिशत र सञ्चालन मुनाफामा ६०.०२ प्रतिशतले वृद्धि भएको छ । असार मसान्तसम्ममा बैंकको वितरण योग्य मुनाफा ४७ करोड ९२ लाख रुपैयाँ रहेको छ ।
नाफासँगै बैंकको प्रतिसेयर आम्दानी (ईपीएस) पनि बढेको छ । समीक्षा अवधिमा बैंकको प्रतिसेयर आम्दानी ५ रुपैयाँ ६४ पैसा बढेर २० रुपैयाँ ५७ पैसा पुगेको छ । सो अवधिसम्ममा बैंकको मूल्य आम्दानी अनुपात १६.५८ गुणा रहेको छ भने प्रतिशेयर नेटवर्थ १७७ रुपैयाँ १९ पैसा रहेको छ । समीक्षा अवधिमा बैंकको चुक्ता पूँजी १३ प्रतिशत बढेको छ भने जगेडा कोष ६.१५ प्रतिशत बढेको छ । त्यसैगरी, बैंकको निक्षेप १७.८८ प्रतिशत र कर्जा २८.३३ प्रतिशत बढेको छ ।
