काठमाडौँ। काठमाडौँमा सेयर बजार अभिमुखीकरण तालिम सम्पन्न भएको छ । काठमाडौँको ब्रिटिस गोर्खा कलेजमा सो तालिम सम्पन्न भएको हो । सुनवर्षी बहुउद्देश्यीय सहकारी संस्था लिमिटेडको आयोजना र अर्थ सरोकारको सहकार्यमा आयोजित सो कार्यक्रममा कलेजका ६० बढी विद्यार्थीहरु सहभागी थिए ।
सो तालिममा सेयर बजारबारे जानकारी, प्राथमिक सेयर बजार र दोश्रो बजारमा प्रवेश गर्ने तरिका, सेयर बजारमा नियामकको भूमिका, सेयर बजारमा प्रवेश गर्दा ख्याल गर्नुपर्ने कुराहरु लगायतका विषयमा सुरज प्याकुरेलले विद्यार्थीहरुमाझ आफ्नो प्रस्तुती दिएका थिए । कार्यक्रममा सेयर बजार सम्बन्धि विद्यार्थीका प्रश्नहरुमाथि पनि छलफल भएको थियो ।
कार्यक्रममा कार्यक्रमका संयोजक डा. निरन्जन रिजालले सुनबर्षी बहुउद्देशीय सहकारीले यस्ता कार्यक्रमहरु आउँदा दिनहरुमा पनि आयोजना गर्ने बताएका थिए भने कार्यक्रममा कलेजका प्रतिनिधिले कार्यक्रम आयोजकलाई धन्यवाद दिएका थिए । कार्यक्रममा सहकारीका अध्यक्ष गणेश घिमिरेले आउँदा दिनहरुमा पनि अर्थ सरोकारको सहकार्यमा विभिन्न यस्ता तालिमहरु आयोजना गर्ने प्रतिबद्धतासमेत व्यक्त गरेका थिए ।
