काठमाडौँ । सीइडिबी हाइड्रोपावर डेभलपमेन्ट कम्पनी लिमिटेड (सीएचडिसी) ले भने आफ्नो वास्तविक विवरण नै लुकाएर सेयरधनीहरुलाई गुमराहमा राखेको खबर अर्थ सरोकारले प्रकाशन गरेपछि सेयर लगानीकर्ताले कम्पनीविरुद्ध उजुरी गरेका थिए । वास्तविक विवरण पनि लुकाउने र भित्रभित्रै गैरकानुनी कारोबार पनि गर्ने कम्पनीविरुद्ध उजुरी परेपछि कम्पनीलाई नेप्सेले स्पष्टीकरण सोधेको थियो । नेप्सेले स्पष्टीकरण सोधेपछि कम्पनीले पनि आफ्नो स्पष्टीकरण बुझाएको छ । तर कम्पनीले बुझाएको स्पष्टिकरण चित्त नबुझेपछि नेप्सेले कानुनी परामर्श थालेको छ ।

सो कम्पनीले स्पष्टीकरण बुझाएको र कम्पनीले पुष्टी गर्न नसकेका बुँदाहरुमा थप कानुन हेरेर, कुराहरु सोधेर अगाडी बढ्न निर्देशन दिईसकेको नेप्सेका सीइओ कृष्ण कार्कीले अर्थ सरोकारलाई बताए । ‘हामीले स्पष्टिकरण सोध्यौँ । कम्पनीले बुँदागत रुपमा जवाफ पनि पठायो । तर कानुन उल्लङ्घन भएका कतिपय बुँदाहरुमा कम्पनीले आफ्नो भनाई पुष्टी गर्न सकेको छैन । त्यसलाई हेरेर पुन: अगाडी बढ्न मैले सम्बन्धित विभागलाई निर्देशन दिईसकेको छु ।’ नेप्सेका सीइओ कार्कीले अर्थ सरोकारसँग भने । अहिले सो कम्पनीमाथि विवरण लुकाएकोदेखि गैरकानुनी काम गरेकोसम्मका आरोप छन् । कम्पनीविरुद्ध नेप्से, नेपाल धितोपत्र बोर्डमा मात्र होइन, कम्पनी रजिष्ट्रारको कार्यालयमासमेत उजुरी दर्ता भईसकेको छ । सम्बन्धित सबै निकायले कारवाही प्रक्रिया अगाडी बढाईसकेका छन्।

यता कम्पनीको सहायक कम्पनी राधीका तत्कालीन अध्यक्षले गैरकानुनी रुपमा सेयर बेचेको मुद्धा पनि नेप्सेमा छ । यससम्बन्धमा नेप्सेले कम्पनीले गलत गरेको भन्ने तथ्य बुझिसकेको र आवश्यक कारवाही प्रक्रिया अगाडी बढिसकेको नेप्सेले जनाएको छ । ‘हामीले सोधेका कतिपय बुँदाहरुमा कम्पनीले बुझाएको स्पष्टीकरण हामीलाई चित्त बुझेको छैन । यस विषयमा हामीले सम्बन्धित कम्पनीलाई पुन: पत्राचार गर्ने र आवश्यक कारवाही प्रक्रिया अगाडी बढाईसकेका छौँ ।’ नेप्सेका सीइओ कार्कीले अर्थ सरोकारसँग भने ।

यता आफुले गरेको गलत कामउपर कारवाही हुने भएपछि अनिल कुमार रुङ्गटा दौडधुपमा लागेका छन् । नेप्सेको विश्वस्त स्रोतले दिएको जानकारी अनुसार आफुले गरेको गलत कामको समाचाहर बाहिरिएपछि अहिले रुङ्गटा नेप्से र धितोपत्र बोर्ड धाईरहेका छन् । ‘केहि समय अगाडी उहाँ (रुङ्गटा) स्वयम् नै नेप्से आउनुभएको थियो । उहाँले आफुविरुद्ध केहि मान्छेहरु लागेको भन्दै आफुलाई कारवाही नगर्न आग्रह गर्नुभएको थियो । उहाँलाई कारवाही नगर्न नेप्सेलाई राजनीतिक प्रेसर पनि छ।’ नेप्से स्रोत भन्छ- ‘उहाँले गलत गर्नुभएको छ भन्ने पनि सबैलाई थाहा छ। अव कारवाही गर्ने कि राजनीतिक प्रेसर नलिने, कारवाही नगर्ने भन्ने विषयमा नेप्से स्वयम् नै अलमलमा छ।