काठमाडौं । आफ्नै खाताको बचत झिक्न नपाएपछि लेबनानमा बैंकका कर्मचारीसहित १० जनालाई बन्धक बनाइएको छ । बिहीबार बन्दुकधारी ४२ वर्षिय सेख हुसेनले खाताको बचत रकम निकाल्न पाउनुपर्ने मागसहित १० जनालाई ६ घण्टासम्म बन्धक बनाएका थिए ।
बन्दुक र पेट्रोलसहित लेबनानको फेडरल बैंकमा पसेका हुसेनले खाताको पैसा निकाल्न नदिए बैंकभित्रै आत्महत्या गर्ने चेतावनी दिएका थिए । लेबनानमा सन् २०१९ देखि सुरु भएको आर्थिक संकटका कारण हुसेनको २ लाख अमेरिकी डलर रकम बैंकमा फसेको अन्तराष्ट्रिय सञ्चारमाध्यमहरुले जनाएका छन् । बुवाको उपचार र पारिवारिक प्रयोजनका लागि पैसा झिक्न नपाएपछि हुेसेनले बैंकका कर्मचारीसहित १० जनालाई बन्धक बनाएका थिए । हुसेनलाई बचतको रकम दिन बैंक तयार भएपछि उनले आत्मसमर्पण गरेका थिए ।
हाल लेबनानमा बचतकर्ताले बैंकबाट निकाल्न पाउने रकममा सीमा तोकिएको छ । आफ्नै पैसा निकाल्न नपाएपछि अहिले लेबनानमा निक्षेपकर्ताहरु आक्रोशित बनेका छन् ।
