काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।
आज कुन–कुन ठाउँमा के–के भयो ? यी दृश्यहरु आफैं बोलिरहेछन् । आजको अंकमा हामिले सातवर्ष बित्दापनि काम सम्पन्न नहुँदा पूर्णता नपाएको जोरपाटी–सुन्दरीजल सडकको दयनिय अवस्थादेखि कञ्चनपुरमा थारु महिलाहरु मौलिक पहिरन बनाउनमा व्यस्त बनेकासम्मका तस्विरलाई फोटोमा समेट्ने प्रयास गरेका छौँ ।
हेरौं फोटो समाचारः
कालोपत्रका लागि ठेक्का भएको सात वर्ष बित्दा पनि काम सम्पन्न हुन नसक्दा जोरपाटी–सुन्दरीजल सडकको नयाँपाटी–बिपी चोकखण्ड धुलाम्य बनेको छ । सडकमा ग्राभेल गरेको ६ महिनासम्म पनि काम हुन नसक्दा धुलाम्य सडकको कारण स्थानीय सास्तिमा परेका छन् ।
बाग्लुङ नगरपालिका ११ रायडाँडामा रहेको एक्लो बस्ती ‘सिकादीप’ ।
बुटवल उपमहानगरपालिका ५ स्थित अमरमथमा प्रतिकेजी १५० रुपैयाँका दरले उपभोक्ताहरु स्याउ खरिद गर्ने गर्दछन् ।
कञ्चनपुरको शुक्लाफाँटा नगरपालिका ३ पिपलाडीका थारु महिलाहरु अझैपनि परम्परागत पहिरन ‘लेहङ्गा’ सिलाउमा व्यस्त देखिन्छन् । चाडपर्वमा थारु महिलाहरु आफ्नै मौलिक परम्परमा सजिने गर्दछन् ।
तनहुँको व्यास नगरपालिकामा निर्बुमा बाख्रा चराउँदै स्थानीय महिलाहरुको दैनिकी बित्छ । पछिल्लो दिनमा गाउँमा बाख्रा तथा पशुपालन गर्ने किसानहरुको संख्या बढेसँगै अहिले अधिकांश महिलाहरु बाख्रा पालनमा व्यस्त देखिन्छन् ।
पाल्पाको रम्भा गाउँपालिका अन्तर्गत पर्ने कालीगण्डकी करिडोर सडकखण्डमा निर्माणको काम तिव्र गतिमा सञ्चालन भईरहेको छ । सडक सञ्जालको विस्ता भएसँगै यहाँका स्थानीयहले सहजताको अनुभुती गरेका छन् ।
भोजपुर नगरपालिका ६ भँगेरीका स्थानीय यतिबेला कोदो रोप्नमा व्यस्त छन् । कोदो उत्पादनका लागि उत्कृष्ट रहेको भँगेरी भेगमा प्राय किसानको मुख्य बालीका रुपमा कोदो रहेको छ ।
म्याग्दीको रघुगंगा गाउँपालिकाको चिमखोलाका स्थानीय गाउँसम्म सहज सडकमार्ग पुर्याउन ढुङ्गाको छपनी बिछ्याउन थालेका छन् । गाउँका युवा तथा स्थानीय पदमार्ग निर्माण गर्नमा यतिबेला व्यस्त बनेका छन् ।
तनहुँको म्याग्दे गाउँपालिका २ निर्मलबस्तीमा रोपाई सकिएपछि समथर भुभाग हरियो देखिएको छ । ९५ प्रतिशत भूभागमा रोपाई सकिएको तनहूँका किसान केही फुर्सदिला बनेका छन् ।
बाग्लुङ नगरपालिका १० स्थित होमस्टे गाउँको शिरमा रहेको भकुण्डे भ्यु टावर पछिल्लो समय पर्यटकको आकर्षणको केन्द्रबिन्दु बनेको छ । टावरबाट देखिने मनोरम दृष्य अवलोकन गर्न र तस्विर कैद गर्न दैनिक आन्तरिक पर्यटकको उपस्थिति बाक्लो हुने गरेको छ ।
