काठमाडौं । राष्ट्रिय बिमा संस्थानले ७ करोड १७ लाख रुपैयाँ खुद नाफा आर्जन गरेको छ । संस्थानले सार्वजनिक गरेको गतवर्षको अन्त्यसम्मको वित्तीय विवरण अनुसार अघिल्लो वर्षको भन्दा २७.४९ प्रतिशत बढी नाफा कमाएको हो । अघिल्लो वर्ष संस्थानको खुद नाफा ५ करोड ६२ लाख रुपैँया रहेको थियो ।
त्यस्तै सोही अवधिमा संस्थानको खुद बिमा शुल्क आम्दानीमा पनि १०.६९ प्रतिशतले वृद्धि भएको छ । गत वर्षको अन्त्यसम्ममा संस्थानको खुद बीमा शुल्क आम्दानी ८ अर्ब ३९ करोड रुपैयाँ पुगेको छ । अघिल्लो वर्षको सोही अवधिमा संस्थानको यस्तो आम्दानी ७ करोड ५८ लाख रुपैयाँ रहेको थियो ।
संस्थालने सार्वजनिक गरेको वित्तीय विवरण अनुसार समिक्षा अवधिमा संस्थानले ३ अर्ब ९३ करोड ४१ लाख रुपैयाँ खुद दाबी भुक्तानी गरेको छ भने कम्पनीले जीवन बिमा कोष पनि ३२ अर्ब ९३ करोड रुपैयाँबाट बढोत्तरी गरेर ३७ अर्ब ४१ करोड रुपैयाँ पुर्याएको छ । हाल राष्ट्रिय बिमा संस्थानको चुक्ता पुँजी १८ करोड १० लाख रुपैयाँ छ भने रिजर्भ कोषमा ४१ करोड ३८ लाख रुपैयाँ रहेको संस्थानले सार्वजनिक गरेको वित्तीय विवरणमा उल्लेख गरिएको छ ।
