काठमाडौं । मेयर बालेन्द्र शाहको ‘सुन्दर महानगर’को अभियानलाई पछ्याउँदै नगरप्रहरीसहितको टोली बुल डोजर लिएर काठमाडौँको विशालनगर पुगेर अनाधिकृत रुपमा बनाइएका संरचना भत्काएको छ ।
महानगरपालिकाले पटक-पटक गरी जानकारी र ताकेता गर्दागर्दै पनि अटेर गरेपछि महानगर आफैले संरचना भत्काएको हो । मंगलबार डोजरसहित विशालनगर पुगेको महानगरको टोलीले नक्साविपरित निर्माण गरिएको मल्पी सिटी स्कुलको पर्खाल र गेट भत्काएको हो ।
‘महानगरले ३५ दिने सूचना जारी गरेको हो । त्यसपछि पनि उहाँहरुले संरचना हटाउनुभएन । पुनः हामीले माईकिङ गरेरै संरचना भत्काउन सूचित गर्यौं । तर, उहाँहरुले संरचना हटाउनुभएन’, महानगर प्रहरी प्रमुख राजुनाथ पाण्डेले भने, ‘साह्रै अटेर गरेपछि संरचनामा डोजर चलाएका हौँ । उहाँहरुले अटेर नगरी आफै संरचना हटाएको भए डोजर चलाउनुपर्ने स्थिति आउने थिएन ।’ मंगलबार सो क्षेत्रमा रहेका अन्य पसल तथा संरचनामा पनि महानगरले डोजर चलाएको छ । बाँकी फोटो फिचरमा हेर्नुहोस्ः
